"பதவிக்கு வந்தும் படம் காட்டும் விஜய்..." தவெக அரசை வெளுத்து வாங்கிய செந்தில் பாலாஜி!

2026 சட்டமன்றத் தேர்தலில் கோயம்புத்தூர் தெற்கு தொகுதியில் திமுக சார்பில் போட்டியிட்டு வெற்றி பெற்ற முன்னாள் அமைச்சரும் தற்போதைய சட்டமன்ற உறுப்பினருமான செந்தில் பாலாஜி, ஜூன் 3 அன்று கோவைக்கு நேரில் சென்றார். தனக்கு வாக்களித்து வெற்றி பெறச் செய்த தொகுதி மக்களுக்குச் சிறப்பான முறையில் உணவளித்து தனது நன்றியைத் தெரிவித்தார். அதனைத் தொடர்ந்து செய்தியாளர்களைச் சந்தித்த அவர், தற்போது தமிழகத்தில் பொறுப்பேற்றுள்ள தவெக அரசு மக்கள் நலனில் அக்கறை காட்டாமல், திமுக மீது தொடர்ந்து குற்றம் சுமத்துவதிலேயே முழு முனையுடன் செயல்பட்டு வருகிறது என்று சாடினார். மக்களுக்கு அளித்த தேர்தல் வாக்குறுதிகளை நிறைவேற்றுவதில் புதிய அரசு கவனம் செலுத்தத் தவறிவிட்டதாகவும் அவர் குற்றம் சாட்டினார்.

முதலமைச்சர் விஜய் மீது நேரடி விமர்சனம்

திரைப்படங்களில் வேண்டுமானால் கவர்ச்சிகரமான வசனங்களைப் பேசலாம், ஆனால் முதலமைச்சராகப் பொறுப்பேற்ற பிறகும் செய்ய வேண்டிய கடமைகளை மறந்து விஜய் அவர்கள் இன்னும் வசனம் மட்டுமே பேசிக் கொண்டிருக்கிறார் என்று செந்தில் பாலாஜி கடுமையாக விமர்சித்தார். ஆளுங்கட்சி செய்யும் தவறுகளைச் சுட்டிக்காட்டுவது மட்டுமே எதிர்க்கட்சியான தங்களின் கடமை என்றும், அதை விடுத்து வேடிக்கை பார்ப்பதற்காகத் தாங்கள் இல்லை என்றும் அவர் தெளிவுபடுத்தினார். தவெக அரசு திமுகவை மட்டுமே குறை கூறிக் கொண்டிருக்காமல், அந்தந்தத் துறை சார்ந்த அமைச்சர்களுடன் ஆய்வுக் கூட்டங்களை நடத்தி அரசுப் பணிகளை எவ்வாறு முன்னோக்கி எடுத்துச் செல்லலாம் என்பதில் கவனம் செலுத்த வேண்டும் என்று அறிவுறுத்தினார்.

டாஸ்மாக் விவகாரம் குறித்து கேள்வி

கடந்த தேர்தல் பிரச்சாரத்தின் போது கரூருக்கு வந்து தவெகவினர் எவ்வளவு அநாகரிகமாகப் பேசினார்கள் என்பதையும், வாகனங்கள் மீது ஏறி நின்று பாட்டுப் பாடி அரசியல் செய்ததையும் செந்தில் பாலாஜி நினைவு கூர்ந்தார். டாஸ்மாக் விவகாரம் தொடர்பாக அப்போது திமுக அரசு கொடுத்த முறையான விளக்கங்களை எதையும் ஏற்றுக்கொள்ளாமல், வெறும் ஓட்டு அரசியலுக்காகத் தங்கள் மீது அவதூறுகளைப் பரப்பினார்கள் என்று சாடினார். ஆனால் இன்று அதே டாஸ்மாக் விவகாரம் குறித்து தவெக அரசின் துறை சார்ந்த அமைச்சர் தான் விளக்கம் கொடுத்துக் கொண்டிருக்கிறார் என்றும், இதைத்தான் சமூக வலைதளங்களில் பொதுமக்கள் தற்போது கேள்வியாக எழுப்பி வருகிறார்கள் என்றும் அவர் சுட்டிக்காட்டினார்.

கனிமொழியின் அதிரடி குற்றச்சாட்டு

இதேபோலப் பொது நிகழ்ச்சி ஒன்றில் பேசிய திமுக நாடாளுமன்ற உறுப்பினர் கனிமொழி, தமிழகத்தில் ஏற்பட்டுள்ள ஆட்சி மாற்றம் குறித்துத் தங்களுக்கு எவ்வித கவலையும் இல்லை என்று குறிப்பிட்டார். ஆனால் தற்போதைய ஆட்சி உண்மையிலேயே பொறுப்பேற்றுச் செயல்படுகிறதா என்ற சந்தேகம் எழுவதாகக் கூறிய அவர், ஆட்சியில் இருப்பவர்கள் முதலில் தங்களின் பொறுப்பை உணர்ந்து செயல்பட வேண்டும் என்று வலியுறுத்தினார். புதிய அரசு அமைந்த பிறகு தமிழகத்தில் நூற்றுக்கும் மேற்பட்ட கொலைகளும், பாலியல் குற்றங்களும் அரங்கேறியுள்ளதாக அவர் குற்றம் சாட்டினார். என்ன நிகழ்ந்தாலும் யார் மீதும் பழியைப் போடாமல் திறம்பட ஆட்சி செய்தவர் கலைஞர் கருணாநிதி என்றும், மு.க.ஸ்டாலினும் அதே நேர்மையான வழியில்தான் ஆட்சியை நடத்தினார் என்றும் கனிமொழி பெருமிதத்துடன் பேசினார்.