சேலம் மேற்கு தொகுதி வேட்பாளரை ஆதரித்துப் பிரச்சாரம் செய்த பாமக நிறுவனர் ராமதாஸ், மேடையிலிருந்து இறங்கும்போது திடீரென மயக்கமடைந்தார். சேலத்தில் முதலுதவிக்குப் பிறகு, இன்று திங்கட்கிழமை (ஏப்ரல் 13) சென்னை அப்பல்லோ மருத்துவமனைக்கு அவர் மாற்றப்பட்டார். அங்கு அவருக்குத் தீவிர சிகிச்சை அளிக்கப்பட்டு வரும் நிலையில், ரத்தத்தில் சர்க்கரை அளவு குறைந்ததே மயக்கத்திற்குக் காரணம் என்று மருத்துவர் ராஜேஷ் விளக்கம் அளித்துள்ளார். இன்னும் இரண்டு நாட்களில் அவர் வீடு திரும்புவார் என்றும் அதன் பிறகு தேர்தல் பணிகளைத் தொடரலாம் என்றும் தெரிவிக்கப்பட்டுள்ளது.
அன்புமணியின் எச்சரிக்கை
ராமதாஸின் உடல்நிலை குறித்துப் பலரும் நலம் விசாரித்து வரும் வேளையில், தற்போதைய அரசியல் சூழல் பெரும் கவனத்தைப் பெற்றுள்ளது. தந்தை ஒரு அணியாகவும், மகன் அன்புமணி ஒரு அணியாகவும் பிரிந்து தேர்தலைச் சந்திக்கும் நிலையில், "தனது தந்தையின் உடல்நலனுக்கு ஏதேனும் பாதிப்பு ஏற்பட்டால் யாரையும் சும்மா விடமாட்டேன்" என்று அன்புமணி ராமதாஸ் அதிரடியாக எச்சரிக்கை விடுத்துள்ளார். சசிகலா தலைமையிலான கூட்டணியில் 30 தொகுதிகளில் களம் காணும் ராமதாஸ் அணிக்கு, இந்த உடல்நலக் குறைவு தற்காலிகத் தொய்வை ஏற்படுத்தியுள்ளது.