தொகுதிப் பங்கீட்டில் ஏற்பட்ட நீண்ட காலத் தாமதம் காரணமாக, காங்கிரஸ் கட்சி திமுக கூட்டணியிலிருந்து விலகி, நடிகர் விஜய்யின் தமிழக வெற்றி கழகத்துடன் கைகோர்க்கப் போவதாக அரசியல் வட்டாரத்தில் பரவலாகப் பேசப்பட்டது. இதனை உறுதிப்படுத்தும் விதமாக, ராகுல் காந்திக்கு நெருக்கமான பிரவீன் சக்கரவர்த்தி விஜயைச் சந்தித்துப் பேசினார். தமிழக காங்கிரஸ் நிர்வாகிகள் மற்றும் ராகுல் காந்தி இதற்கு விருப்பம் தெரிவித்த போதிலும், சோனியா காந்தியின் தலையீட்டால் அந்தத் திட்டம் கைவிடப்பட்டதாகக் கூறப்படுகிறது. இதனால் அதிருப்தியடைந்த ராகுல் காந்தி, அண்டை மாநிலங்களான கேரளா மற்றும் புதுச்சேரிக்குச் சென்றபோது கூடத் தமிழகத்தைப் புறக்கணித்தது பேசுபொருளானது.
பரப்புரைத் திட்டமும் ஆர்.எஸ். பாரதியின் விளக்கமும்
முன்னதாக சேலத்தில் நடைபெற்ற மெகா பொதுக்கூட்டத்திற்கு விடுக்கப்பட்ட அழைப்பை ராகுல் காந்தி நிராகரித்த நிலையில், தற்போது நாளை அவர் தமிழகம் வந்து தேர்தல் பரப்புரையில் ஈடுபட உள்ளதாகத் தகவல்கள் வெளியாகியுள்ளன. இந்தச் சூழலில், முதலமைச்சர் மு.க. ஸ்டாலினும் ராகுல் காந்தியும் இணைந்து ஒரே மேடையில் வாக்கு சேகரிப்பார்கள் என்று எதிர்பார்க்கப்பட்டது. ஆனால், திமுக தலைவர் ஸ்டாலின் ஏற்கனவே 30-க்கும் மேற்பட்ட தொகுதிகளில் பிரச்சாரம் செய்யத் திட்டமிட்டுள்ளதால், அவரது அட்டவணையை இறுதி நேரத்தில் மாற்ற இயலாது என திமுக அமைப்புச் செயலாளர் ஆர்.எஸ். பாரதி விளக்கம் அளித்துள்ளார். இதனால் இருவரும் தனித்தனியாகவே பிரச்சாரம் மேற்கொள்ளும் சூழல் உருவாகியுள்ளது.