திருச்சி கிழக்கு தொகுதி இடைத்தேர்தலில் நடிகர் ராகவா லாரன்ஸ் போட்டியிடப் போவதாக கடந்த சில நாட்களாக ஊடகங்களில் பல்வேறு தகவல்கள் பரவி வந்தன. இது குறித்து கடந்த ஞாயிற்றுக்கிழமை விளக்கமளிப்பதாகக் கூறியிருந்த அவர், அதன்படியே இன்று தனது அதிகாரப்பூர்வ சமூக வலைதளப் பக்கத்தில் விரிவான வீடியோ ஒன்றை வெளியிட்டுள்ளார். சுமார் 18 நிமிடங்கள் ஓடக்கூடிய இந்த வீடியோ பதிவை ஒரு சுவாரஸ்யமான குட்டிக் கதையுடன் லாரன்ஸ் தொடங்கினார். திருச்சி கிழக்கு தொகுதி இடைத்தேர்தல் களத்தில் தான் போட்டியிட வேண்டும் என்றால், முதலில் தான் முழுமையாக அரசியலுக்குள் வர வேண்டும் என்பதை அவர் சுட்டிக்காட்டினார். தான் நீண்ட காலமாகச் செய்து வரும் சமூகச் சேவைகள் குறித்து மக்கள் அனைவரும் நன்கு அறிவர் என்றும், தன்னால் முடிந்த வரையில் அந்தப் பணிகளைத் தொடர்ந்து தொய்வில்லாமல் மேற்கொண்டு வருவதாகவும் அவர் அதில் குறிப்பிட்டுள்ளார்.
அரசியல் தொடக்கப்புள்ளியும் ரஜினி, விஜய் தாக்கமும்
தமிழகத்தில் நடந்த ஜல்லிக்கட்டுப் போராட்டத்தில் தான் பங்கேற்றதையும், அதன் பின்னர் அரசியல் கட்சித் தலைவரான அண்ணன் சீமான் தன் மீது வைத்த விமர்சனத்திற்குத் தான் அளித்த பதிலடிதான் தனது அரசியல் பயணத்திற்கான உண்மையான தொடக்கப்புள்ளி என்றும் லாரன்ஸ் நினைவுகூர்ந்தார். தொடர்ந்து, சூப்பர் ஸ்டார் ரஜினிகாந்த் அரசியலுக்கு வரக் கூடாது எனப் பல தரப்பிலும் கருத்துகள் தெரிவிக்கப்பட்ட போது, அவருக்கு ஆதரவாகச் செயல்படத் தான் விரும்பியதாகவும், அப்போது மக்கள் மத்தியில் பெரிய எதிர்பார்ப்பு நிலவியதாகவும் கூறினார். இது குறித்துத் தனது வீட்டில் பேசிய போது, அரசியல் வேண்டாம் என அவரது தாயார் தடுத்துள்ளார். அதன் பின்னரே, கரோனா தொற்று பரவல் போன்ற அசாதாரண சூழல் காரணமாகத் தான் அரசியலுக்கு வரப்போவதில்லை என ரஜினிகாந்த் அதிகாரப்பூர்வமாக அறிவித்தார்.
தாயாரின் பச்சைக்கொடியும் மக்கள் கருத்துக் கணிப்பும்
ரஜினிகாந்தின் முடிவுக்குப் பிறகு, தனது நெருங்கிய நண்பரான விஜய் அரசியலுக்கு வரப்போவதாகத் தெரிவித்ததை லாரன்ஸ் நினைவு கூர்ந்தார். விஜய்யின் திரைப்பயணத்தில் இணைந்து தானும் பணியாற்றியுள்ளதாகக் குறிப்பிட்ட அவர், விஜய் ஒரு மிகச்சிறந்த உழைப்பாளி என்றார். இது குறித்தும் தனது தாயாரிடம் பேசிய போது, அப்போதும் அவர் அரசியல் வேண்டாம் என்றே பிடிவாதமாகக் கூறியுள்ளார். ஆனால், தற்போது தேர்தல் முடிந்து முடிவுகள் வெளியானதும் நண்பர் விஜய் சரித்திரத்தையே புரட்டிப் போட்டுள்ளார் என நெகிழ்ந்தார். மக்களின் நம்பிக்கையைப் பெற்று நண்பர் விஜய் சாதித்ததைக் காட்டி, நல்லவர்களுக்கு மக்கள் எப்போதும் வாய்ப்பு தருவார்கள் என்று புரிய வைத்த பிறகு, அவரது தாயாரும் மனம் மாறி ‘நீ நினைத்ததைச் செய்’ எனப் பச்சைக்கொடி காட்டியுள்ளார். இதனைத் தொடர்ந்து, “நான் அரசியலுக்கு வரலாமா? வேண்டாமா? அதற்கான தகுதி எனக்கு உள்ளதா?” என்பதைத் தனது ரசிகர்களும் பொதுமக்களும் கமெண்ட் பாக்ஸ் மூலம் தெரிவிக்க வேண்டும் என்றும், மக்களின் இறுதி முடிவுக்காகத் தான் ஆவலோடு காத்திருப்பதாகவும் ராகவா லாரன்ஸ் அந்த வீடியோவில் உருக்கமாகக் கேட்டுக்கொண்டுள்ளார்.