தமிழக சட்டப்பேரவை தேர்தல் நெருங்கி வரும் வேளையில், தேமுதிக தனது அரசியல் பயணத்தில் ஒரு முக்கிய முடிவை எடுத்துள்ளது. கட்சி தொடங்கப்பட்ட காலத்திலிருந்தே அதிமுக, பாஜக போன்ற கட்சிகளுடன் கூட்டணி அமைத்து வந்த தேமுதிக, முதல்முறையாக திமுகவுடன் கைகோர்த்துள்ளது. இந்தச் சூழலில், தேமுதிக பொதுச்செயலாளர் பிரேமலதா விஜயகாந்த் இன்று தனது 57-வது பிறந்தநாளைத் தனது மகன்கள் மற்றும் தொண்டர்களுடன் கேக் வெட்டிக் கொண்டாடினார். அவருக்கு முதலமைச்சர் மு.க. ஸ்டாலின் தொலைபேசி வாயிலாக முதல் ஆளாக வாழ்த்துத் தெரிவித்தது அரசியல் வட்டாரத்தில் கவனிக்கத்தக்க ஒன்றாக அமைந்தது.
பெண்களை இழிவுபடுத்துவோருக்கு எச்சரிக்கை
பிறந்தநாள் கொண்டாட்டத்திற்குப் பிறகு செய்தியாளர்களைச் சந்தித்த பிரேமலதா, முன்னாள் அமைச்சர் சி.வி. சண்முகத்தின் சர்ச்சைக்குரிய பேச்சுக்குக் கடும் கண்டனம் தெரிவித்தார். விழுப்புரத்தில் நடந்த ஆர்ப்பாட்டத்தின் போது, முதலமைச்சரின் திட்டத்தை விமர்சிப்பதாகக் கூறி நடிகை நயன்தாரா குறித்து சி.வி. சண்முகம் பேசியது பெரும் அதிர்ச்சியை ஏற்படுத்தியது. இது குறித்துப் பேசிய பிரேமலதா, "பெண்களுக்குப் பாதுகாப்பு இல்லை என்று கூறி ஆர்ப்பாட்டம் நடத்துபவர்களே, ஒரு பெண்ணைத் தரக்குறைவாகப் பேசுவதை ஏற்க முடியாது. நடிகையாக இருந்தாலும் சரி, எந்தப் பெண்ணாக இருந்தாலும் சரி, அவர்களை இழிவுபடுத்துவதை இத்துடன் நிறுத்திக்கொள்ள வேண்டும். மீறினால் ஒட்டுமொத்தப் பெண் சக்தியையும் திரட்டி மிகப்பெரிய போராட்டத்தை முன்னெடுப்பேன்" என்று எச்சரித்தார்.
கூட்டணி மற்றும் தொகுதிப் பங்கீடு
திமுக உடனான கூட்டணி குறித்துப் பேசிய அவர், தொகுதிப் பங்கீடு தொடர்பான பேச்சுவார்த்தைகள் விரைவில் தொடங்கப்படும் என்று உறுதி அளித்தார். தேர்தல் களம் சூடுபிடித்துள்ள நிலையில், காலம் குறைவாக இருப்பதால் சீக்கிரமாகப் பேச்சுவார்த்தைகளை முடித்துவிட்டுத் தேர்தல் வேலைகளில் இறங்கப் போவதாக அவர் தெரிவித்தார். முதலமைச்சர் ஸ்டாலின் காட்டிய அன்பிற்கும் வாழ்த்திற்கும் தனது நன்றியையும் அவர் இத்தருணத்தில் பகிர்ந்துகொண்டார்.