ரஷ்யாவிடமிருந்து கச்சா எண்ணெய் கொள்முதல் செய்வதற்கு அமெரிக்கா 30 நாட்கள் கால அவகாசம் அளித்துள்ள விவகாரம் தொடர்பாக, இந்திய ஒன்றிய பாஜக அரசைத் தமிழ்நாடு முதலமைச்சர் மு.க. ஸ்டாலின் கடுமையாக விமர்சித்துள்ளார். இது குறித்து அவர் வெளியிட்டுள்ள அறிக்கையில், இந்தியாவின் வெளியுறவுக் கொள்கை மற்றும் இறையாண்மை குறித்துப் பல்வேறு கேள்விகளை எழுப்பியுள்ளார்.
"நமது நாட்டிற்குத் தேவையான எரிபொருளை வாங்குவதற்கு இன்னொரு நாட்டின் அனுமதி நமக்கு ஏன் தேவை?" என்று வினவியுள்ள அவர், இந்தியாவின் நீண்டகாலமாகப் போற்றப்படும் 'சுதந்திரமான வெளியுறவுக் கொள்கையில்' தற்போதைய ஒன்றிய பாஜக அரசு முற்றிலும் சமரசம் செய்துவிட்டதாகத் தெரிவதாகக் குற்றம் சாட்டியுள்ளார். சர்வதேச அரங்கில் இந்தியாவின் கண்ணியம் எக்காரணம் கொண்டும் விட்டுக்கொடுக்கப்படக் கூடாது என்றும், நாட்டின் இறையாண்மை மற்றும் தேசிய நலன்களைப் பாதுகாப்பதில் அரசு உறுதியாக இருக்க வேண்டும் என்றும் அவர் வலியுறுத்தியுள்ளார். ஒரு வளர்ந்து வரும் வல்லரசு நாடாக இந்தியா இருக்கும் வேளையில், இறக்குமதி விவகாரங்களில் வெளிநாட்டின் தலையீடு இருப்பதை ஏற்க முடியாது என்பது முதலமைச்சரின் கருத்தாக உள்ளது.