தஞ்சாவூரில் நடைபெற்ற பூண்டி கலைவாணன் இல்லத் திருமண விழாவில் கலந்துகொண்டு பேசிய திமுக தலைவர் மு.க.ஸ்டாலின், தேர்தல்களில் கிடைக்கும் வெற்றியையும் தோல்வியையும் திமுக சமமாகவே கருதுவதாகக் குறிப்பிட்டார். தற்போதைய தேர்தல் முடிவுகளை வைத்து திமுகவின் கதை முடிந்துவிட்டது என எதிரிகள் சிலர் இரங்கற்பா பாடத் தொடங்கியுள்ளனர். ஆனால், 1949-இல் தொடங்கப்பட்ட இந்த இயக்கம் எத்தனையோ சவால்களையும், வீழ்ச்சிகளையும் கடந்துதான் மீண்டும் ஃபீனிக்ஸ் பறவையாக எழுச்சி பெற்றுள்ளது. எனவே, மேடையில் இருப்பவர்களோ அல்லது தொண்டர்களோ தற்போதைய சூழலைக் கண்டு சோகமடையத் தேவையில்லை.
மக்கள் மனதில் என்றும் திராவிட மாடல் ஆட்சி
திமுக அரசு கடந்த ஐந்து ஆண்டு கால ஆட்சியில் அனைத்து தரப்பு மக்களுக்கும் பயனுள்ள எண்ணற்ற நற்பணிகளையும் திட்டங்களையும் செயல்படுத்தியுள்ளது. நாம் நேரடியாக ஆட்சிக்கட்டிலில் இல்லை என்றாலும், புதிய அரசிடம் நாம் முன்வைத்த கோரிக்கையின்படி திமுகவின் திட்டங்களே தற்போதும் தொடரப் படுகின்றன. மக்களின் வாழ்வாதாரத்தோடு கலந்திருக்கும் இந்தத் திட்டங்கள் தொடரும் வரை, தமிழகத்தில் எப்போதும் திராவிட மாடல் ஆட்சிதான் மறைமுகமாக நடந்து கொண்டிருக்கிறது. நாம் செய்த சாதனைகளை யாராலும் அத்தனை எளிதில் அழித்துவிட முடியாது.
தோல்விக்கான காரணத்தை அலசும் புதிய இணையதளம்
தேர்தல் தோல்வியால் தான் சோர்வடையவில்லை என்று குறிப்பிட்ட மு.க.ஸ்டாலின், மக்கள் நமக்கு ஏன் வாய்ப்பளிக்கவில்லை என்பதை ஆராய தனிக் குழு அமைக்கப்பட்டுள்ளதாகத் தெரிவித்தார். கட்சியின் பலவீனங்கள் மற்றும் குறைகளைக் கண்டறிய ஒரு புதிய இணையதளமும் தொடங்கப்பட்டுள்ளது. இதன் மூலம் கட்சி நிர்வாகிகள் மட்டுமன்றி, அனைத்து தரப்பு மக்களும் தங்களது கருத்துகளையும், ஆலோசனைகளையும் வெளிப்படையாகப் பதிவு செய்யலாம் என அவர் அழைப்பு விடுத்தார்.
சமூக வலைதளங்களின் சூழ்ச்சியும் குட்டீஸ்களின் பிரச்சாரமும்
தேர்தலுக்கு முன்பாக திமுக பல்வேறு களப்பணிகளைச் செய்தும் வெற்றிபெற முடியாமல் போனதற்குக் காரணமான ஒரு ரகசியத்தை அவர் உடைத்தார். புதியதாக ஆட்சிக்கு வந்தவர்கள் பூத் ஏஜெண்டுகள், வாக்கு எண்ணும் முகவர்கள் என எந்தவொரு அடிப்படைத் தேர்தல் பணிகளையும் செய்யவில்லை; மக்களைக் கூட நேரில் சந்திக்கவில்லை. ஆனால், இன்ஸ்டாகிராம் போன்ற சமூக வலைதளங்களை மிகச் சரியாகப் பயன்படுத்தி, சிறு குழந்தைகளை வைத்துப் பிரச்சாரம் செய்யத் தூண்டியுள்ளனர். அந்தக் குழந்தைகள் மூலம் வீட்டில் இருக்கும் பெரியவர்களையும், பெற்றோர்களையும் திட்டமிட்டுத் தங்களுக்கு வாக்களிக்க வைத்துள்ளனர். இந்த டிஜிட்டல் வியூகம் நம் கண்ணுக்குத் தெரியாமல் போய்விட்டது.
விழித்துக்கொண்ட திமுக... இனி அதிரடிதான்!
எதிரிகளின் இந்த சமூக வலைதள வியூகத்தை இனிவரும் காலங்களில் முறியடிப்பதற்கான புதிய திட்டங்களை திமுக வகுத்து வருவதாக ஸ்டாலின் உறுதியளித்தார். இனி நாம் எச்சரிக்கையுடன் செயல்பட்டு அடுத்த தேர்தலில் மீண்டும் ஆட்சியைப் பிடிப்போம் எனத் தொண்டர்களுக்கு நம்பிக்கை ஊட்டினார். நாம் இன்னும் ஐந்து ஆண்டுகள் ஆட்சியில் நீடித்திருந்தால் மக்கள் நலத்திட்டங்களை மேலும் சிறப்பாகத் தொடர்ந்திருக்கலாம் என்ற ஒரு வருத்தம் மட்டுமே தன்னிடம் இருப்பதாகக் கூறிய அவர், இனிவரும் நாட்களில் மக்கள் பிரச்னைகளுக்காக ஒரு வலுவான எதிர்க்கட்சியாக நின்று திமுக தீவிரமாகச் செயல்படும் என்று தன் உரையை நிறைவு செய்தார்.