வேலூர் மாவட்டம் காட்பாடியை அடுத்த கரசமங்கலத்தில், தமிழக முன்னாள் முதல்வர் எம்.ஜி.ஆருக்காக சுமார் 3 கோடி ரூபாய் மதிப்பீட்டில் பிரம்மாண்டமான கோயில் கட்டப்பட்டு, அதன் கும்பாபிஷேக விழா நேற்று வெகு விமரிசையாக நடைபெற்றது. ராமச்சந்திரா அறக்கட்டளையின் நிர்வாகி டி.ஆர். முரளி என்பவரால் உருவாக்கப்பட்டுள்ள இந்தக் கோயில், மத நல்லிணக்கத்தைப் போற்றும் வகையில் இந்து, கிறிஸ்துவம் மற்றும் இஸ்லாம் ஆகிய மூன்று மதங்களின் அடையாளங்களையும் உள்ளடக்கிய கோபுரங்களுடன் தனித்துவமாக அமைக்கப்பட்டுள்ளது. கோயிலின் உள்ளே சுமார் 17 லட்சம் ரூபாய் மதிப்பில் ஐம்பொன்னால் ஆன எம்.ஜி.ஆரின் முழு உருவச்சிலை நிறுவப்பட்டு, அதற்குச் சிறப்புப் பூஜைகள் செய்யப்பட்டன.
கும்பாபிஷேகத்தை முன்னிட்டு கடந்த இரண்டு நாட்களாக விக்னேஸ்வர பூஜை, கணபதி ஹோமம் உள்ளிட்ட பல்வேறு யாகசாலை பூஜைகள் விமரிசையாக நடைபெற்றன. நேற்று காலை புனித நீர் ஊற்றப்பட்டு கோபுரங்களுக்கும் எம்.ஜி.ஆர் சிலைக்கும் மகா கும்பாபிஷேகம் செய்யப்பட்டபோது, திரளான பொதுமக்கள் மற்றும் எம்.ஜி.ஆர் ரசிகர்கள் கலந்துகொண்டு தரிசனம் செய்தனர். இந்த நிகழ்வில் சென்னை முன்னாள் மேயர் சைதை துரைசாமி, தொழிலதிபர் சேகர் ரெட்டி உள்ளிட்ட முக்கியப் பிரமுகர்கள் பங்கேற்றுச் சிறப்பித்தனர். மக்கள் திலகம் எம்.ஜி.ஆரின் நினைவைப் போற்றும் வகையில் அமைந்துள்ள இக்கோயில் தற்போது அப்பகுதி மக்களின் கவனத்தை ஈர்த்துள்ளது