தமிழக சட்டமன்றத் தேர்தல் களம் சூடு பிடித்திருக்கும் வேளையில், யாரும் திர்பாராத ஒரு அரசியல் அதிரடி நிகழ்ந்துள்ளது. நீண்ட நாட்களாக அதிமுகவுடன் கூட்டணி அமைக்கும் என்று எதிர்பார்க்கப்பட்ட தேமுதிக, தற்போது ஆளுங்கட்சியான திமுகவுடன் கரம் கோர்த்துள்ளது. இந்த திடீர் நகர்வு தமிழக அரசியல் வட்டாரங்களில் பெரும் பரபரப்பையும் விவாதத்தையும் கிளப்பியுள்ளது.
அறிவாலயத்தில் அரங்கேறிய அரசியல் சங்கமம்
தேமுதிக பொதுச் செயலாளர் பிரேமலதா விஜயகாந்த், சென்னை அண்ணா அறிவாலயத்திற்கு நேரில் வருகை தந்து திமுக தலைவரும் முதலமைச்சருமான மு.க. ஸ்டாலினைச் சந்தித்தார். இந்தச் சந்திப்பின் போது, தேமுதிக அதிகாரப்பூர்வமாக திமுக கூட்டணியில் இணைவதாக அறிவிக்கப்பட்டது. பலமுனைப் போட்டி நிலவும் சூழலில், தேமுதிகவின் இந்த முடிவு திமுக கூட்டணிக்கு கூடுதல் பலத்தை அளித்துள்ளதாகக் கருதப்படுகிறது.
முக்கிய தலைவர்கள் முன்னிலையில் உறுதிசெய்யப்பட்ட கூட்டணி
இந்த முக்கியத்துவம் வாய்ந்த சந்திப்பின் போது முதலமைச்சர் மு.க. ஸ்டாலினுடன் அமைச்சர் உதயநிதி ஸ்டாலின் மற்றும் நாடாளுமன்ற உறுப்பினர் கனிமொழி ஆகியோர் உடனிருந்தனர். விஜயகாந்தின் மறைவிற்குப் பிறகு தேமுதிக எடுக்கப்போகும் தேர்தல் முடிவு என்னவாக இருக்கும் என்ற கேள்விக்கு, இந்தச் சந்திப்பு ஒரு தெளிவான விடையைத் தந்துவிட்டது.
திசை மாறிய தேர்தல் வியூகம்
கடந்த சில வாரங்களாகவே அதிமுக மற்றும் தேமுதிக இடையே தொகுதிப் பங்கீடு குறித்த பேச்சுவார்த்தைகள் ரகசியமாக நடைபெற்று வருவதாகத் தகவல்கள் வெளியாகின. ஆனால், கடைசி நேரத்தில் நிகழ்ந்த இந்த அரசியல் மாற்றம் அதிமுக தரப்பிற்குப் பின்னடைவாகவும், திமுகவிற்கு ஒரு வியூக வெற்றியாகவும் பார்க்கப்படுகிறது. தொகுதிப் பங்கீடு மற்றும் தேர்தல் பணிகள் குறித்த அடுத்தகட்ட அறிவிப்புகள் விரைவில் வெளியாகும் என எதிர்பார்க்கப்படுகிறது.