உலகப்புகழ் பெற்ற மதுரை மீனாட்சி அம்மன் கோவில் சித்திரைத் திருவிழா கடந்த 19-ம் தேதி கொடியேற்றத்துடன் தொடங்கி விறுவிறுப்பாக நடைபெற்று வருகிறது. விழாவின் எட்டாம் நாளில் மீனாட்சி அம்மன் பட்டாபிஷேகமும், ஒன்பதாம் நாளில் தேவர்களை வென்று சிவபெருமானைச் சந்திக்கும் திக் விஜயமும் சிறப்பாக நடந்தன. சௌந்தர்யன் மற்றும் சட்டம் ராஜசேகரன் ஆகியோர் மீனாட்சி - சொக்கநாதராக வேடமணிந்து போர் புரியும் தத்ரூப நிகழ்வைத் தொடர்ந்து, விழாவின் 10-ம் நாளான இன்று காலை மணமேடையில் மணக்கோலத்தில் சுவாமிகள் எழுந்தருளினர். அதிகாலை 4 மணிக்கே வெள்ளி சிம்மாசனத்தில் வீதி உலா வந்த சுவாமி, பின்னர் கன்னி ஊஞ்சல் ஆடி, திருக்கல்யாண மண்டபத்தை அடைந்தார். சரியாக காலை 8:35 மணி முதல் 8:59 மணிக்குள் வேத மந்திரங்கள் முழங்க மீனாட்சி அம்மனுக்கு மங்கல நாண் சூட்டப்பட்டது. இந்த இனிய தருணத்தில் வானில் இருந்து மலர்கள் தூவப்பட, லட்சக்கணக்கான பக்தர்கள் "சொக்கநாதா... மீனாட்சி..." என பக்தி முழக்கமிட்டு தரிசித்தனர்.
பக்தர்களின் நேர்த்திக்கடனும் பாதுகாப்பு ஏற்பாடுகளும்
திருக்கல்யாணம் முடிந்தவுடன், அங்கு கூடியிருந்த ஆயிரக்கணக்கான பெண்கள் தங்கள் தாலி பாக்கியம் நிலைக்க வேண்டிப் புதிய மஞ்சள் கயிற்றை மாற்றிக்கொண்டனர். இந்த மங்கல நிகழ்வைக் காணத் தமிழகத்தின் பல்வேறு பகுதிகளில் இருந்தும் பக்தர்கள் மதுரையில் குவிந்ததால், மாநகரம் விழாக்கோலம் பூண்டிருந்தது. கூட்ட நெரிசலைத் தவிர்க்கவும், அனைவரும் நிகழ்வைக் காணவும் முக்கிய இடங்களில் எல்.இ.டி (LED) திரைகள் மூலம் நேரலை செய்யப்பட்டது. குடிநீர், மருத்துவம் மற்றும் பலத்த போலீஸ் பாதுகாப்பு உள்ளிட்ட ஏற்பாடுகளை மாவட்ட நிர்வாகமும் மாநகராட்சியும் போர்க்கால அடிப்படையில் மேற்கொண்டிருந்தன. இன்று இரவு 7:30 மணிக்கு யானை வாகனம் மற்றும் பூப்பல்லக்கில் சுவாமிகள் வீதி உலா வரவுள்ள நிலையில், நாளை அதிகாலை சித்திரைத் திருவிழாவின் மற்றுமொரு சிகர நிகழ்வான தேரோட்டம் பிரம்மாண்டமாக நடைபெற உள்ளது.