தமிழகத்தில் இறுதி ஊர்வலங்களின் போது நடைபெறும் அத்துமீறல்களைத் தடுக்கவும், அவற்றை ஒழுங்குபடுத்தவும் புதிய சட்டம் கொண்டு வருவது குறித்து தமிழக தலைமைச் செயலர் அறிக்கை தாக்கல் செய்ய வேண்டும் என்று சென்னை உயர் நீதிமன்றம் உத்தரவிட்டுள்ளது. மதுரையில் கடந்த ஆண்டு மார்ச் மாதம் கல்லூரி மாணவிகள் சென்ற பேருந்தை இறுதி ஊர்வலத்தில் வந்த போதை கும்பல் மறித்து, மாணவிகளிடம் ஆபாசமாக நடந்துகொண்டதுடன் ஓட்டுநரைத் தாக்கி வாகனத்தையும் சேதப்படுத்தியது. இந்தச் சம்பவம் தொடர்பாக வழக்குப் பதிவு செய்யப்பட்ட நிலையில், குற்றம் சாட்டப்பட்ட சங்கர், அஜித்குமார், சந்திரபோஸ் ஆகியோர் தாக்கல் செய்த முன்ஜாமீன் மனுக்களை விசாரித்த நீதிபதி கே.கே. ராமகிருஷ்ணன் இந்த முக்கிய உத்தரவைப் பிறப்பித்தார்.
முன்ஜாமீன் மறுப்பும் நீதிபதியின் கண்டனமும்
மனுதாரர்களின் கோரிக்கையை நிராகரித்த நீதிபதி, மது போதையில் அவர்கள் செய்த செயலைச் சாதாரணமாகக் கடந்து செல்ல முடியாது என்று குறிப்பிட்டார். இறுதி ஊர்வலங்களில் பங்கேற்பது என்பது சமூக மற்றும் கலாச்சார நடைமுறையாக இருக்கலாம், ஆனால் அது பொதுமக்களின் பாதுகாப்புக்கு அச்சுறுத்தலாகவோ அல்லது வன்முறையில் முடிவதற்கோ காரணமாக அமையக்கூடாது என்று அவர் சாடினார். இவர்களைக் காவலில் எடுத்து விசாரிக்க வேண்டிய அவசியம் உள்ளதால், முன்ஜாமீன் மனுக்கள் தள்ளுபடி செய்யப்படுவதாக அவர் அறிவித்தார். ஏற்கனவே கடலூரில் இறுதி ஊர்வலத்தில் வீசப்பட்ட மாலையினால் பொறியாளர் ஒருவர் உயிரிழந்த சம்பவத்தை நீதிமன்றம் தாமாக முன்வந்து விசாரித்ததை நீதிபதி இதன்போது நினைவு கூர்ந்தார்.
புதிய சட்டத்தின் அவசியம் குறித்து அறிக்கை
இறுதி ஊர்வலங்களுக்கான கட்டுப்பாடுகள் குறித்து டிஜிபி ஏற்கனவே சுற்றறிக்கை அனுப்பியிருந்தாலும், இது போன்ற ஒழுங்கீனச் செயல்கள் தொடர்ச்சியாக நடைபெற்று வருவதை நீதிமன்றம் சுட்டிக்காட்டியுள்ளது. எனவே, இதுபோன்ற நிகழ்வுகளை முழுமையாக ஒழுங்குபடுத்த புதிய சட்டம் ஒன்றை இயற்றுவது குறித்து அரசு ஆராய வேண்டும் என்று நீதிமன்றம் வலியுறுத்தியுள்ளது. இது தொடர்பாக மேற்கொள்ளப்பட்ட நடவடிக்கைகள் குறித்து ஜூலை 31-ஆம் தேதிக்குள் தலைமைச் செயலர் விரிவான அறிக்கை தாக்கல் செய்ய வேண்டும் என்று உத்தரவிட்ட நீதிபதி, வழக்கின் அடுத்தகட்ட விசாரணையை அன்றைய தினத்திற்கே ஒத்திவைத்தார்.