சூரியன், பூமி மற்றும் சந்திரன் ஆகிய மூன்றும் நேர்க்கோட்டில் சந்திக்கும் 2026-ஆம் ஆண்டின் முதல் முழு சந்திர கிரகணம் இன்று நிகழ உள்ளது. பூமியின் வளிமண்டலத்தில் சூரிய ஒளி ஊடுருவும்போது ஏற்படும் ஒளிச்சிதறல் காரணமாக, நிலவு இன்று அடர் சிவப்பு நிறத்தில் 'பிளட் மூன்' (Blood Moon) ஆகக் காட்சியளிக்கப் போகிறது. குறிப்பாக, ஓசோன் படலத்தின் வழியாகச் செல்லும் ஒளி உறிஞ்சப்படுவதால், நிலவின் விளிம்பில் மெல்லிய நீல நிறக் கோடு தோன்றும் அரிய நிகழ்வையும் இன்று காண முடியும் என்று வானியல் ஆய்வாளர்கள் தெரிவித்துள்ளனர்.
நேரம் மற்றும் காணக்கூடிய இடங்கள்
இந்திய நேரப்படி இன்று மாலை 3:20 மணிக்கு பகுதி நேர கிரகணமும், 4:45 மணிக்கு முழு சந்திர கிரகணமும் தொடங்குகிறது. மாலை 5:10 மணி அளவில் நிலவு முழுமையாக ரத்தச் சிவப்பில் காட்சியளிக்கும். வடகிழக்கு மாநிலங்களான அஸாம், அருணாச்சலப் பிரதேசம் ஆகியவற்றில் கிரகணத்தை முழுமையாகக் காணலாம். சென்னை, பெங்களூரு போன்ற நகரங்களில் சூரிய மறைவுக்குப் பிறகு கிரகணத்தின் இறுதிக் கட்டத்தை மட்டும் பார்க்க முடியும். மாலை 6:47 மணியுடன் இந்த வானியல் நிகழ்வு நிறைவடைகிறது.
கோவில் நடை திறப்பு மற்றும் வழிபாட்டு மாற்றங்கள்
கிரகண நேரத்தின்போது நிலவும் எதிர்மறை ஆற்றல் நம்பிக்கைகள் காரணமாக, தமிழகத்தில் உள்ள பெரும்பாலான கோவில்கள் இன்று மதியம் 2 மணி முதல் நடை சாத்தப்படுகின்றன. கிரகணம் முடிந்த பிறகு இரவு 8 மணிக்கு மேல் புண்ணியாவாஜனம் மற்றும் தூய்மைப் பணிகள் முடிந்த பிறகே பக்தர்கள் அனுமதிக்கப்படுவர். திருப்பதி ஏழுமலையான் கோவிலிலும் சந்திர கிரகணத்திற்கு 6 மணி நேரத்திற்கு முன்னரே நடை சாத்தப்பட்டு, இரவு 8:30 மணிக்கு மேல் தரிசனத்திற்கு ஏற்பாடு செய்யப்பட்டுள்ளது. இதன் காரணமாக திருப்பதியில் இன்று இலவச தரிசன டோக்கன்கள் வழங்குவது தற்காலிகமாக நிறுத்தப்பட்டுள்ளது.
தமிழகத்தில் உள்ள ஆலயங்கள் வழக்கம்போல காலையில் திறக்கப்பட்டு வழிபாடுகள் நடைபெறும். இருப்பினும், கிரகண காலத்தை முன்னிட்டு மதியம் 2 மணி முதல் கிரகணம் முழுமையாக நிறைவடையும் வரை கோவில்களின் கதவுகள் அடைக்கப்பட்டு, பக்தர்களின் தரிசனம் தற்காலிகமாக நிறுத்தப்படும் என அறிவிக்கப்பட்டுள்ளது. இது தொடர்பாக இந்து சமய அறநிலையத்துறை அதிகாரிகள் தெரிவிக்கையில், கிரகணத்தின் தாக்கம் மற்றும் ஆகம விதிகளைக் கருத்தில் கொண்டு இந்த முடிவு எடுக்கப்பட்டுள்ளதாகக் குறிப்பிட்டுள்ளனர்.
இரவு நேரப் பூஜைகளும் தரிசன அனுமதியும்
கிரகணம் முடிந்த பிறகு, இரவு 8 மணிக்கு மேல் கோவில்கள் மீண்டும் திறக்கப்படும். அப்போது 'புண்ணியாவாஜனம்' எனப்படும் புனிதப்படுத்தும் கலச பூஜைகள் மற்றும் ஆலயத் தூய்மைப் பணிகள் மேற்கொள்ளப்படும். இந்தச் சிறப்பு வழிபாடுகள் நிறைவு பெற்ற பின்னரே, குறிப்பிட்ட நேரத்திற்குப் பக்தர்கள் சாமி தரிசனம் செய்ய அனுமதிக்கப்படுவார்கள். இந்த நடைமுறை மாற்றங்கள் மற்றும் வழிபாட்டு நேரங்கள் அந்தந்தக் கோவில்களின் ஐதீகத்திற்கு ஏற்ப மாறுபடலாம் என்றும் தெரிவிக்கப்பட்டுள்ளது.