கிருஷ்ணகிரி மாவட்டம் ராயக்கோட்டை பகுதியில் 14 வயது சிறுவன் ஒருவன் தனது பெற்றோருடன் வாடகை வீட்டில் வசித்து வருகிறான். அதே வீட்டின் மேல் தளத்தில் 9-ஆம் வகுப்பு பயிலும் மாணவி ஒருவர் வசித்து வருகிறார். கீழ் வீட்டில் இருக்கும் மாணவரைச் சந்திக்க அவனது பள்ளி நண்பர்கள் இருவர் அடிக்கடி வந்து சென்றுள்ளனர். அப்போது அந்த மாணவியைப் பற்றி விசாரித்த நண்பர்களிடம், மாணவியின் இன்ஸ்டாகிராம், பேஸ்புக் மற்றும் செல்போன் எண்கள் தன்னிடம் இருப்பதாக அந்த சிறுவன் தெரிவித்துள்ளான். அந்த விவரங்களைப் பெற்றுக்கொண்ட நண்பர்கள், மாணவியின் புகைப்படங்களை பதிவிறக்கம் செய்து, அவற்றை ஆபாசமான முறையில் மார்பிங் செய்து போலி கணக்கு மூலம் மாணவிக்கே அனுப்பி அதிர்ச்சி கொடுத்துள்ளனர்.
வீடியோ கேட்டு மிரட்டலும் பணப் பறிப்பு முயற்சியும்
மார்பிங் செய்யப்பட்ட புகைப்படங்களைக் கண்டு பதறிய மாணவி, இது குறித்து அந்த மாணவர்களிடம் கேட்டுள்ளார். அப்போது, இந்தப் புகைப்படங்களை உனது தந்தைக்கு அனுப்பிவிடுவோம் என்று மிரட்டிய அந்த சிறுவர்கள், அப்படி செய்யாமல் இருக்க வேண்டுமானால் தங்களுக்கு ஆடையின்றி வீடியோ எடுத்து அனுப்ப வேண்டும் என்று மாணவியை வற்புறுத்தியுள்ளனர். பயந்துபோன மாணவியும் அவர்கள் கேட்டபடி வீடியோவை அனுப்பியுள்ளார். இதனைத் தொடர்ந்து, அந்த வீடியோக்களை மாணவியின் தந்தையின் வாட்ஸ்அப் எண்ணிற்கு அனுப்பி வைத்த சிறுவர்கள், தங்களுக்கு 10 லட்சம் ரூபாய் தர வேண்டும் என்றும், இல்லையெனில் வீடியோவை வெளியிடுவோம் என்றும் மிரட்டல் விடுத்துள்ளனர்.
தந்தையின் புகார் மற்றும் போலீஸ் நடவடிக்கை
மிரட்டல் செய்தியைக் கண்டு அதிர்ச்சியடைந்த மாணவியின் தந்தை, அந்த செல்போன் எண் குறித்து ரகசியமாக விசாரித்தபோது, அது தனது கீழ் வீட்டில் வசிக்கும் சிறுவனுடையது என்பது அம்பலமானது. இது குறித்து அவர் கிருஷ்ணகிரி அனைத்து மகளிர் காவல் நிலையத்தில் உடனடியாக புகார் அளித்தார். புகாரின் பேரில் விரைந்து செயல்பட்ட போலீசார், போக்சோ உள்ளிட்ட சட்டப்பிரிவுகளின் கீழ் வழக்குப் பதிவு செய்து, மூன்று பள்ளி மாணவர்களையும் கைது செய்தனர். கைதான சிறுவர்கள் மூவரும் சேலத்தில் உள்ள அரசு கூர்நோக்கு இல்லத்தில் அடைக்கப்பட்டனர். சிறு வயதிலேயே தொழில்நுட்பத்தைத் தவறாகப் பயன்படுத்தி சக மாணவியையே மிரட்டிய இந்தச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.