பாட்டாளி மக்கள் கட்சியின் நிறுவனர் ராமதாஸ் மற்றும் அக்கட்சியின் தலைவர் அன்புமணி ராமதாஸ் இடையேயான குடும்ப மற்றும் அரசியல் மோதல் தற்போது உச்சத்தை எட்டியுள்ளது. கடந்த 2024 டிசம்பரில், ராமதாஸ் தனது பேரன் முகுந்தனை இளைஞர் அணித் தலைவராக அறிவித்ததை அன்புமணி எதிர்த்ததில் தொடங்கிய இந்த விரிசல், இன்று கட்சியின் அதிகாரத்திற்கும் மாம்பழம் சின்னத்திற்கும் உரிமை கோரும் அளவிற்குப் பூதாகரமாகியுள்ளது. இரு தரப்பினரும் தங்களுக்கு ஆதரவானவர்களைக் கட்சியில் இருந்து நீக்கி வரும் நிலையில், தேர்தல் ஆணையத்திலும் டெல்லி உயர் நீதிமன்றத்திலும் மாறி மாறி வழக்குகளைத் தொடர்ந்து வருகின்றனர்.
சின்னம் முடங்கும் அபாயத்தில் பாமக?
தேர்தல் நெருங்கும் வேளையில், மாம்பழம் சின்னத்திற்கு இருவருமே உரிமை கோருவதால், தேர்தல் ஆணையம் மற்றும் டெல்லி உயர் நீதிமன்றத்தின் முந்தைய உத்தரவுப்படி, அந்தச் சின்னம் முடக்கப்படவே அதிக வாய்ப்புகள் உள்ளன. அங்கீகாரம் பெறாத கட்சிகளின் விவகாரங்களில் நீதிமன்றம் தலையிட விரும்பாத சூழலில், சின்னம் யாருக்கும் கிடைக்காத நிலை உருவாகலாம் என அரசியல் வட்டாரங்கள் கருதுகின்றன.
தற்போது, மாம்பழம் சின்னத்தைப் பயன்படுத்த அன்புமணிக்குத் தடை விதிக்கக் கோரி ராமதாஸ் தரப்பு தேர்தல் ஆணையத்தில் புதிய மனுவைத் தாக்கல் செய்துள்ளது. அன்புமணியின் பதவிக்காலம் முடிந்துவிட்டதாகவும், கடந்த ஆண்டு டிசம்பரில் நடந்த பொதுக்குழுவில் ராமதாஸ் தலைவராகத் தேர்வு செய்யப்பட்டுவிட்டதாகவும் அந்த மனுவில் குறிப்பிடப்பட்டுள்ளது. மேலும், இந்த மோதலால் சட்டம் ஒழுங்கு பாதிக்கப்படும் அபாயம் உள்ளதாகக் கூறி சின்னத்தை முடக்க வலியுறுத்தியுள்ளனர். சென்னை உயர் நீதிமன்றத்தில் இருந்த வழக்கை வாபஸ் பெற்று, உரிமையியல் நீதிமன்றத்தில் புதிய வழக்கை ராமதாஸ் தரப்பு தொடர்ந்துள்ளதும் குறிப்பிடத்தக்கது.