திமுக - காங்கிரஸ் இடையிலான தொகுதிப் பங்கீடு பேச்சுவார்த்தை இன்று சுமுகமாக நடைபெற்ற நிலையில், தமிழக காங்கிரஸ் தலைவர் செல்வப்பெருந்தகை கூட்டணியின் வலிமையை உறுதிப்படுத்தியுள்ளார். திமுகவிடம் தாங்கள் கோரிய தொகுதிகள் பட்டியலை அளித்துள்ளதாகவும், அவர்கள் அதனைப் பரிசீலிப்பதாக உறுதியளித்துள்ளதாகவும் அவர் தெரிவித்துள்ளார். கொள்கை ரீதியான இந்த கூட்டணி மிகவும் உறுதியானது என்றும், மதவாத சக்திகளுக்குத் தமிழ் மண்ணில் இடமில்லை என்றும் அவர் திட்டவட்டமாகக் குறிப்பிட்டார். மேலும், ராகுல் காந்தியின் தமிழ்நாட்டுப் பற்றை வலியுறுத்திய செல்வப்பெருந்தகை, புதிய கட்சிகளுடன் கூட்டணி பேச்சுவார்த்தை நடத்துவதாக வெளியான தகவல்களை வதந்தி என மறுத்துள்ளார்.
இதனைத் தொடர்ந்து பேசிய தமிழக காங்கிரஸ் பொறுப்பாளர் கிரிஷ் சோடங்கர், கடந்த தேர்தலை விட அதிக தொகுதிகளைத் தாங்கள் கேட்டுள்ளதாகத் தெரிவித்தார். குறிப்பாக, தொகுதிப் பங்கீடு மட்டுமின்றி ஆட்சியில் பங்கு குறித்தும் திமுக குழுவிடம் பேசியிருப்பது அரசியல் வட்டாரத்தில் கவனம் ஈர்த்துள்ளது. இரு நாட்களுக்குள் மீண்டும் பேச்சுவார்த்தை நடத்த வாய்ப்புள்ளதாகவும், பேச்சுவார்த்தை மிகவும் நம்பிக்கையுடன் நகர்வதாகவும் அவர் கூறினார்.