கோடை முழுவதும் செயல்படும் வகையில், வெப்ப பக்கவாதம் (Heat Stroke) உள்ளிட்ட வெப்பத்தால் ஏற்படும் உடல்நலக் கோளாறுகளுக்காக தனி வார்டுகள் மற்றும் படுக்கை அறைகள் அமைக்கப்பட்டுள்ளன. இந்த சிறப்பு வார்டுகளில் ஏசி வசதி, வெண்டிலேட்டர்கள், அவசர சிகிச்சை உபகரணங்கள் உள்ளிட்ட அனைத்து அத்தியாவசிய வசதிகளும் தயார் நிலையில் வைக்கப்பட்டுள்ளன.
மேலும், உடலில் நீர்ச்சத்து குறைவதைத் தடுக்கும் நோக்கில் ஓஆர்எஸ் (ORS) கரைசல் மருத்துவமனையில் போதிய அளவில் இருப்பில் வைக்கப்பட்டுள்ளது. வெப்பத்தால் பாதிக்கப்படும் நோயாளிகளுக்கு உடனடி சிகிச்சை அளிக்க மருத்துவர்கள் மற்றும் சுகாதார பணியாளர்கள் முழு தயார்நிலையில் உள்ளதாக மருத்துவமனை நிர்வாகம் தெரிவித்துள்ளது.
இலவச ஓ.ஆர்.எஸ்
தமிழ்நாடு பொது சுகாதாரத் துறை மாநிலம் முழுவதும் உள்ள அரசு மருத்துவமனைகள், அரசு ஆரம்ப சுகாதார நிலையங்கள், நகர்ப்புற சுகாதார மையங்கள் மற்றும் மாநகராட்சி சுகாதார நிலையங்களில் ஓஆர்எஸ் கரைசலை இலவசமாக வழங்க உத்தரவிட்டுள்ளது.
அனைத்து அரசு சுகாதார நிலையங்களிலும் போதிய அளவு ஓஆர்எஸ் கரைசல் வைத்திருக்க அதிகாரிகளுக்கு அறிவுறுத்தப்பட்டுள்ளதாகவும், பொதுமக்கள் அருகிலுள்ள அரசு மருத்துவமனைகள் மற்றும் சுகாதார மையங்களில் இதை இலவசமாக பெறலாம் என்றும் தெரிவிக்கப்பட்டுள்ளது.
தமிழ்நாட்டில் வெப்பநிலை தொடர்ந்து உயர்ந்து வருவதால், அரசு மருத்துவமனைகள் அனைத்தும் கோடை வெப்பத்தை எதிர்கொள்ள தயார்நிலையில் உள்ளன. பொதுமக்கள் தேவையற்ற வெளிச்சூழலில் செல்வதைத் தவிர்த்து, போதிய தண்ணீர் அருந்தி, உடல்நலத்தை பாதுகாக்க வேண்டுமென சுகாதாரத்துறை அறிவுறுத்தியுள்ளது.