மிழக சட்டமன்றத் தேர்தல் முடிவடைந்துள்ள நிலையில், இந்தியக் குடிமக்கள் மட்டுமே வாக்களிக்க முடியும் என்ற சட்டத்தை மீறி, வெளிநாட்டு குடியுரிமை பெற்றவர்கள் சட்டவிரோதமாக வாக்களித்ததாகப் புகார் எழுந்தது. இந்தியக் குடியுரிமையைத் துறந்து ஆஸ்திரேலியா, கனடா, இலங்கை மற்றும் ஐரோப்பிய நாடுகளின் பிரஜைகளாக மாறியவர்களுக்கு இந்தியாவில் வாக்களிக்கும் உரிமை கிடையாது. இந்த விவகாரம் இந்தியத் தேர்தல் ஆணையத்தின் கவனத்திற்குச் சென்றதை அடுத்து, சென்னை, கோவை, திருச்சி, மதுரை உள்ளிட்ட சர்வதேச விமான நிலையங்களில் உள்ள குடியுரிமை அதிகாரிகள் தீவிர கண்காணிப்பில் ஈடுபடுத்தப்பட்டனர்.
விமான நிலையங்களில் சிக்கிய வெளிநாட்டுத் தமிழர்கள்
வெளிநாடுகளுக்குத் திரும்பச் செல்வதற்காக விமான நிலையம் வந்த பயணிகளின் கை விரல்களைச் சோதனையிட அதிகாரிகளுக்கு உத்தரவிடப்பட்டது. இதன்போது, வெளிநாட்டு பாஸ்போர்ட் வைத்திருந்தும் விரலில் தேர்தல் மை அடையாளத்துடன் இருந்த பயணிகள் தடுத்து நிறுத்தப்பட்டனர். தேர்தல் விதிகளை மீறித் தங்கள் சொந்தத் தொகுதிகளில் வாக்களித்த 17 பேரை அதிகாரிகள் அடையாளம் கண்டு, அவர்களின் பயணத்தை ரத்து செய்தனர். பிடிபட்ட அனைவரும் உடனடியாகக் காவல் துறையினரிடம் ஒப்படைக்கப்பட்டனர். ஆன்லைன் மூலமாக வாக்காளர் அடையாள அட்டைகளைப் பெற்று இவர்கள் இந்த அத்துமீறலில் ஈடுபட்டது முதற்கட்ட விசாரணையில் தெரியவந்துள்ளது.
தொடரும் விசாரணை மற்றும் எச்சரிக்கை
கைது செய்யப்பட்டவர்கள் அனைவரும் வெளிநாடுகளில் நிரந்தரக் குடியுரிமை பெற்றிருந்தாலும், சமீபத்தில் நடைபெற்ற வாக்காளர் பட்டியல் திருத்தப் பணிகளின்போது முறைகேடாகப் பெயரைச் சேர்த்துள்ளது அம்பலமாகியுள்ளது. வெளிநாட்டுப் பிரஜையாக மாறிய பின் இந்திய பாஸ்போர்ட் ரத்தாகிவிடும் நிலையில், இவர்கள் எந்த அடிப்படையில் வாக்களித்தனர் என்பது குறித்து முழுமையான விசாரணை நடத்தக் காவல் துறைக்கு உத்தரவிடப்பட்டுள்ளது. ஜனநாயகக் கடமையைச் சட்டப்படி இந்தியக் குடிமக்கள் மட்டுமே நிறைவேற்ற வேண்டும் என்பதை இந்தச் சம்பவம் மீண்டும் வலியுறுத்தியுள்ளது.