அதிமுக பொதுச்செயலாளர் எடப்பாடி பழனிசாமிக்கு எதிராக முன்னாள் அமைச்சர் சி.வி.சண்முகம் தலைமையில் தனி அணியாகத் திரண்டு போர்க்கொடி தூக்கிய எம்எல்ஏக்களின் திட்டங்கள் தற்போது தடம்மாறத் தொடங்கியுள்ளன. சட்டப்பேரவையில் தமிழக வெற்றிக் கழகத்தின் ஆட்சிக்கு ஆதரவளித்துவிட்டு, புதிய அமைச்சரவையில் இடம் பெறலாம் என்ற கனவில் சி.வி.சண்முகம் தரப்பினர் களம் கண்டனர். ஆனால், அவ்வாறு செய்தால் கட்சித் தாவல் தடைச் சட்டத்தின் கீழ் சட்டச் சிக்கல்கள் ஏற்படும் என்பதால் தவெக தலைமை இவர்களது கோரிக்கையை ஏற்க மறுத்துவிட்டது. இதன் காரணமாக, சண்முகம் அணியில் தீவிரமாக இருந்த மரகதம் குமரவேல், சத்யபாமா, ஜெயக்குமார், இசக்கி சுப்பையா ஆகிய 4 எம்எல்ஏக்கள் தங்களது பதவிகளை அதிரடியாக ராஜினாமா செய்துவிட்டு தவெகவில் இணைந்தனர். இவர்களைத் தொடர்ந்து மேலும் சில நிர்வாகிகளும் தவெகவுக்கு மாறக்கூடும் என்ற பரபரப்பான சூழல் நிலவி வருகிறது.
பழனிசாமியைச் சந்தித்த முக்கியப் புள்ளிகள்
பயன்படுத்திக் கொண்ட சண்முகம் தரப்பைச் சேர்ந்த மேலும் 5 முக்கிய எம்எல்ஏக்கள், தங்களது அரசியல் எதிர்காலத்தைக் கருதி மீண்டும் பொதுச்செயலாளர் எடப்பாடி பழனிசாமிக்குத் தங்களது ஆதரவை வெளிப்படுத்தியுள்ளனர். அதன்படி நத்தம் விஸ்வநாதன், திருத்தணி அரி, புவனகிரி அருண்மொழித்தேவன், பழனி ரவி மனோகரன் மற்றும் ஓசூர் பாலகிருஷ்ண ரெட்டி ஆகிய 5 பேரும் எடப்பாடி பழனிசாமியை அவரது இல்லத்திற்கு நேரில் சென்று சந்தித்து தங்களது முழு ஆதரவைத் தெரிவித்தனர். இந்த திடீர் கட்சித் தாவல் சண்முகம் முகாமுக்குப் பலத்த பின்னடைவை ஏற்படுத்தியுள்ளது. அதே சமயம், எஸ்பி வேலுமணி, சி.வி.சண்முகம், காமராஜ், அன்பழகன், மரகதம் வெற்றிவேல், சேகர், ராகேஷ், விஜயபாஸ்கர், வீரமணி மற்றும் லீமா ரோஸ் ஆகியோர் இன்னும் பழனிசாமியைச் சந்தித்து ஆதரவு தெரிவிக்காமல் தங்களது அடுத்தகட்ட நகர்விற்காகக் காத்திருப்பதாக அரசியல் வட்டாரங்கள் தெரிவிக்கின்றன.