தமிழக சட்டமன்றத் தேர்தலுக்கான வியூகங்களை வகுக்கும் வகையில், திமுக தனது கூட்டணிக் கட்சிகளுடன் தொகுதிப் பங்கீடு பேச்சுவார்த்தையை இன்று அதிகாரப்பூர்வமாகத் தொடங்கியது. திமுகவின் நீண்டகால மரபின்படி, முதல் கட்டப் பேச்சுவார்த்தைக்கு இந்திய யூனியன் முஸ்லிம் லீக் (IUML) கட்சிக்கு அழைப்பு விடுக்கப்பட்டது. திமுகவின் மூத்த நிர்வாகிகள் டி.ஆர்.பாலு, கே.என்.நேரு உள்ளிட்ட ஏழு பேர் கொண்ட குழுவினருடன், ஐயுஎம்எல் தலைவர் காதர் மொய்தீன் தலைமையிலான குழுவினர் சென்னை அண்ணா அறிவாலயத்தில் விரிவான ஆலோசனையில் ஈடுபட்டனர்.
ஐந்து தொகுதிகள் கோரிக்கை
ஆலோசனைக் கூட்டத்திற்குப் பிறகு செய்தியாளர்களைச் சந்தித்த பேராசிரியர் காதர் மொய்தீன், தங்கள் கட்சி சார்பில் ஐந்து சட்டமன்றத் தொகுதிகளை திமுகவிடம் கோரியுள்ளதாகத் தெரிவித்தார். ஆனால், தற்போதைய கூட்டணியில் புதிய கட்சிகள் இணைந்துள்ள சூழலைக் கருத்தில் கொண்டு, தொகுதிகளைப் பகிர்ந்து கொள்வதில் உள்ள எதார்த்த நிலையை திமுக தரப்பு விளக்கியுள்ளது. இதற்குப் பதிலளிக்கும் விதமாக, ஐந்து இடங்கள் கிடைக்காவிட்டாலும் குறைந்தபட்சம் நான்கு தொகுதிகளாவது ஒதுக்கப்பட வேண்டும் என்ற கோரிக்கையை முன்வைத்துள்ளதாக அவர் குறிப்பிட்டார்.
காதர் மொய்தீன் மயக்கம்!
கூட்டணியின் பலம் குறித்து நம்பிக்கையுடன் பேசிக்கொண்டிருந்த காதர் மொய்தீன், திடீரென உடல்நலக்குறைவு ஏற்பட்டு செய்தியாளர்கள் முன்னிலையிலேயே மயக்கமடைந்தார். இதனால் அங்கு பெரும் பரபரப்பு ஏற்பட்டது. அங்கிருந்த நிர்வாகிகள் அவரை உடனடியாக அண்ணா அறிவாலயத்தின் உட்பகுதிக்கு அழைத்துச் சென்று முதலுதவி அளித்தனர். தற்போது ரமலான் மாதம் என்பதால், நோன்பு கடைப்பிடித்து வருவதால் ஏற்பட்ட சோர்வு காரணமாக அவர் மயங்கியிருக்கலாம் என்று கூறப்படுகிறது.