சென்னை எழும்பூர் ரயில் நிலையத்தின் 10 மற்றும் 11 ஆகிய நடைமேடைகளில் நடைபெற்று வரும் பிரம்மாண்ட மறுசீரமைப்பு பணிகள் காரணமாக, சென்னை கடற்கரை - தாம்பரம் இடையிலான 40-க்கும் மேற்பட்ட மின்சார ரயில் சேவைகள் ரத்து செய்யப்பட்டுள்ளன. இதனால் ஆயிரக்கணக்கான பயணிகள் தினசரி எதிர்கொள்ளும் சிரமங்களைக் கருத்தில் கொண்டு, தெற்கு ரயில்வே நிர்வாகம் மாநகரப் போக்குவரத்துக் கழகத்துடன் இணைந்து பல்வேறு அதிரடி மாற்று ஏற்பாடுகளைச் செய்துள்ளது.
இலவச பேருந்து சேவை மற்றும் நேர மாற்றம்
வருகின்ற பிப்ரவரி 28, 2026 சனிக்கிழமை முதல், தாம்பரம் மற்றும் சென்னை கடற்கரை இடையே உச்ச நேரங்களில் (Peak Hours) சிறப்பு பேருந்துகள் இயக்கப்பட உள்ளன. செல்லுபடியாகும் ரயில் டிக்கெட் அல்லது சீசன் டிக்கெட் வைத்திருக்கும் பயணிகள், இந்தப் பேருந்துகளில் முற்றிலும் இலவசமாகப் பயணிக்கலாம். காலை 6.40 முதல் 9.40 மணி வரையிலும், மாலை 5.00 முதல் இரவு 8.00 மணி வரையிலும் ஒவ்வொரு 7 நிமிட இடைவெளியில் இந்தப் பேருந்துகள் இயக்கப்படும். இவை தாம்பரம், குரோம்பேட்டை, கிண்டி, எழிலகம் மற்றும் பாரீஸ் கார்னர் உள்ளிட்ட முக்கிய நிறுத்தங்களில் நின்று செல்லும்.
விரைவுப் பாதையில் 15 பெட்டிகள் கொண்ட சிறப்பு ரயில்கள்
நெரிசலைக் குறைக்க, தற்போதைய சேவைகளுடன் கூடுதலாக 15 பெட்டிகள் கொண்ட 5 சிறப்பு மின்சார ரயில்கள் விரைவுப் பாதையில் (Fast Line) இயக்கப்பட உள்ளன. இந்த ரயில்கள் தாம்பரம், கிண்டி, மாம்பலம், எழும்பூர் மற்றும் கடற்கரை ஆகிய நிலையங்களில் மட்டுமே நின்று செல்லும் என்பதால், பயண நேரம் 15 நிமிடங்கள் வரை குறையும். மேலும், இந்த ரயில் மாற்றங்களுக்கு வசதியாக சோழன் எக்ஸ்பிரஸ் காலை 10.15 மணிக்குப் புறப்படும் வகையில் மாற்றப்பட்டுள்ளது. நெல்லை மற்றும் பொதிகை விரைவு ரயில்கள் தற்காலிகமாகத் தாம்பரத்துடன் தங்கள் சேவையை முடித்துக் கொள்ளவும், அங்கிருந்தே புறப்படவும் ஏற்பாடு செய்யப்பட்டுள்ளது.
மார்ச் 10 முதல் முழுமையான தீர்வு
பயணிகளின் நீண்ட நாள் எதிர்பார்ப்பான பரங்கிமலை (St. Thomas Mount) – வேளச்சேரி இடையேயான புதிய MRTS இணைப்புப் பாதை மார்ச் 10, 2026 முதல் பயன்பாட்டிற்கு வருகிறது. இந்த புதிய இணைப்பு செயல்பாட்டிற்கு வந்தவுடன், தாம்பரம் - கடற்கரை இடையிலான பயணிகளின் போக்குவரத்துத் தேவை 100 சதவீதம் பூர்த்தி செய்யப்படும் என்று தெற்கு ரயில்வே நம்பிக்கை தெரிவித்துள்ளது. இந்தத் திட்டமிட்ட முன்னேற்பாடுகளால் மார்ச் தொடக்கத்திலேயே போக்குவரத்து நெரிசல் பெருமளவு குறையும் என எதிர்பார்க்கப்படுகிறது.