சென்னை புரசைவாக்கத்தில் உள்ள அரசு மகப்பேறு மருத்துவமனையில் கடந்த மாதம் தனலட்சுமி என்ற பெண்ணுக்கு ஆண் குழந்தை ஒன்று பிறந்தது. எதிர்பாராத விதமாக அங்குள்ள ஒரு மருத்துவக் கருவியில் ஏற்பட்ட மின்கசிவு காரணமாகத் தீ விபத்து ஏற்பட்டு, அந்தப் பச்சிளம் குழந்தையின் உடலில் 23 சதவீதம் அளவுக்குப் பலத்த தீக்காயங்கள் உண்டானது. உயிருக்கு ஆபத்தான நிலையில் இருந்த அக்குழந்தை, உடனடி மேல் சிகிச்சைக்காக எழும்பூர் அரசு குழந்தைகள் நல மருத்துவமனையில் அனுமதிக்கப்பட்டது. சிகிச்சைக்கு வந்தபோது குழந்தையின் உடல் வெப்பநிலை மிகவும் குறைந்தும், நாடித்துடிப்பு பலவீனமாகவும் இருந்ததாக டீன் சாந்தாராமன் மற்றும் மருத்துவ அதிகாரிகள் தெரிவித்தனர்.
மருத்துவமனை இயக்குனர் மதிவாணன் தலைமையிலான குழுவினர், காலம் தாழ்த்தாமல் குழந்தையின் காயங்களைச் சுத்தப்படுத்தி திசு சிகிச்சையைத் தொடங்கினர். நான்கு நாட்கள் செயற்கை சுவாசக் கருவியின் உதவியுடன் தீவிர சிகிச்சைப் பிரிவில் கண்காணிக்கப்பட்ட அந்தப் பிஞ்சு குழந்தைக்கு, கிருமித் தொற்று ஏற்படாமல் இருக்க தொடர்ந்து 14 நாட்களுக்கு ஆன்டிபயாடிக் மருந்துகள் வழங்கப்பட்டன. சிகிச்சையின் மூன்றாம் நாளிலேயே குழாய் வழியாகத் தாய்ப்பால் புகட்டப்பட்டு, பின்னர் படிப்படியாக நேரடி முறைக்கு மாற்றப்பட்டது. மருத்துவர்களின் 24 நாள் தொடர் போராட்டத்திற்குப் பிறகு, குழந்தை முழு ஆரோக்கியத்துடன் குணமடைந்து தற்போது வீடு திரும்பியுள்ளது. தனது குழந்தையின் உயிரை மீட்டெடுத்த மருத்துவர்களுக்குப் பெற்றோர் நெகிழ்ச்சியுடன் கண்ணீர் மல்க நன்றி கூறினர்.