சென்னையில் உள்ள திமுகவின் தலைமை இடமான அண்ணா அறிவாலயத்தில், அக்கட்சியின் இளைஞர் அணி மாவட்ட, மாநகர மற்றும் மாநில அளவிலான அமைப்பாளர்கள், துணை அமைப்பாளர்களின் ஆலோசனைக் கூட்டம் மிக முக்கியமாக நடைபெற்றது. இந்த நிகழ்வில் திமுக தலைவர் மு.க.ஸ்டாலின் மற்றும் சட்டப்பேரவை எதிர்க்கட்சித் தலைவரும், இளைஞர் அணியின் செயலாளருமான உதயநிதி ஸ்டாலின் உள்ளிட்ட முக்கியப் பொறுப்பாளர்கள் பலர் முன்னிலை வகித்தனர். இக்கூட்டத்தின் வாயிலாக மொத்தம் 9 முக்கியத் தீர்மானங்கள் ஒருமனதாக நிறைவேற்றப்பட்டன.
கடந்த பொதுத்தேர்தலில் திமுக தலைமையிலான மதச்சார்பற்ற முற்போக்குக் கூட்டணிக்கு ஆதரவாக வாக்கு செலுத்திய 1 கோடியே 54 லட்சத்து 82 ஆயிரத்து 782 வாக்காளர்களுக்கு தங்களது நன்றியினைத் தெரிவித்துக் கொண்டனர். மேலும், தேர்தல் களத்தை வெற்றிகரமாக வழிநடத்தி 73 தொகுதிகளில் கூட்டணி வேட்பாளர்களின் வெற்றிக்கு அச்சாரம் அமைத்துக் கொடுத்த திமுக தலைவர் மு.க.ஸ்டாலினுக்கு மனமார்ந்த நன்றியும், களத்தில் சோர்வின்றி உழைத்த இளைஞர் அணி நிர்வாகிகளுக்குப் பாராட்டுகளும் உரித்தாக்கப்பட்டது. வரும் ஜூன் 3-ஆம் தேதி வரவிருக்கும் மறைந்த முன்னாள் முதல்வர் கருணாநிதியின் பிறந்தநாளை, பொதுமக்களுக்குப் பயனளிக்கும் வகையில் எழுச்சியோடு கொண்டாட முடிவெடுக்கப்பட்டது. அதோடு, தேர்தலில் திமுக சில இடங்களில் வெற்றிவாய்ப்பை தவறவிட்டதற்கான காரணங்களை ஆராய்ந்து, கட்சி மேற்கொள்ளவிருக்கும் அனைத்து மறுசீரமைப்புப் பணிகளுக்கும் இளைஞர் அணி முழுமையாகத் துணைநிற்கும் என்றும் உறுதியளிக்கப்பட்டது.
காங்கிரஸின் துரோக அரசியலுக்கு வன்மையான கண்டனம்
கடந்த காலங்களில் நடைபெற்ற பல்வேறு தேர்தல்களில் திமுகவின் பலத்தோடு களம் கண்டு, பல சட்டமன்ற மற்றும் நாடாளுமன்ற உறுப்பினர்களைப் பெற்றுக் கொண்ட இயக்கம் காங்கிரஸ் கட்சியாகும். அவர்களின் வெற்றிக்கு திமுகவினரின் தீவிர உழைப்புதான் மிக முக்கியக் காரணம் என்பதை எவராலும் மறுக்க இயலாது. அண்மையில் முடிந்த தேர்தலிலும் கூட, திமுக தொண்டர்களின் உழைப்பினால் தான் 5 சட்டமன்ற உறுப்பினர்களை காங்கிரஸ் வென்றெடுத்தது. தேசியக் கட்சி என்ற அந்தஸ்தில் இருந்துகொண்டு, தேர்தலுக்கு முன்பாகவே பிராந்தியக் கட்சியான திமுகவின் ஆதரவோடு மாநிலங்களவை உறுப்பினர் பதவியையும் அவர்கள் தட்டிச் சென்றனர்.
இவ்வளவு பலன்களைப் பெற்றுக் கொண்ட காங்கிரஸ் கட்சியினர், எவ்வித நன்றி உணர்வும் இல்லாமல் ஒரே இரவில் தங்களது கூட்டணியை மாற்றிக் கொண்டுள்ளனர். இத்தனை பாரம்பரியமிக்க ஒரு பேரியக்கம், குறைந்தபட்ச அரசியல் நாகரிகத்தைக் கூட கடைப்பிடிக்கத் தவறிவிட்டது. அடுத்தவர்களின் உழைப்பைத் தங்களுக்குச் சாதகமாகப் பயன்படுத்திக் கொண்டு கொழுப்பதும், சுயநலத்திற்காகத் தங்களது கொள்கைகளைத் தூக்கி எறிந்துவிட்டு துரோகம் செய்வதும் காங்கிரஸ் கட்சிக்குப் புதியதொரு விஷயம் அல்ல. இன்று நமக்குத் துரோகம் இழைத்தவர்கள், நாளை தங்களுக்குப் பதவி வழங்கிய புதிய கூட்டாளிகளுக்கும் இதையேதான் செய்வார்கள். தாங்கள் பயணிக்கும் படகிலேயே ஓட்டையிடும் குணம் படைத்தவர்கள் காங்கிரஸ் கட்சியினர். சொந்த பலத்தில் என்றைக்குமே வெற்றி பெற முடியாமல், தங்களை நம்பியவர்களுக்கெல்லாம் வஞ்சகம் செய்யும் அறமற்ற காங்கிரஸ் கட்சிக்கு இந்த இளைஞர் அணி கூட்டம் தனது வன்மையான கண்டனத்தைப் பதிவு செய்கிறது.
தவெக அரசின் சட்டம்-ஒழுங்கு சீர்கேடும் ரீல்ஸ் விளம்பரங்களும்
தமிழகத்தில் தவெக ஆட்சிப் பொறுப்பை ஏற்ற வெறும் 13 நாட்களிலேயே சட்டம்-ஒழுங்கு முற்றிலும் சீர்கெட்டுப் போயுள்ளது. ஏறத்தாழ 30-க்கும் மேற்பட்ட கொலை, கொள்ளை மற்றும் பாலியல் வன்கொடுமை சம்பவங்கள் அரங்கேறி, மாநிலத்தின் பாதுகாப்பு கேள்விக்குறியாகியுள்ளது குறித்து செய்திகள் வந்தவண்ணம் உள்ளன. ஆனால், இந்த அவலங்களைச் சரிசெய்யாமல், சமூக வலைத்தள 'ரீல்ஸ்' மூலமாக மக்களின் கவனத்தைத் திசைதிருப்பும் முயற்சிகள் நடக்கின்றன. இத்தகைய வெற்று விளம்பர உத்திகளைக் கையாளுவதைத் தவிர்த்துவிட்டு, முதலமைச்சர் நேரடியாகப் பத்திரிகையாளர்களைச் சந்தித்து பொதுமக்களின் கேள்விகளுக்கு உரிய விளக்கமளிக்க வேண்டும். தற்போதைய அரசு 'ரீல்' ஆட்சியை உடனடியாக நிறுத்திவிட்டு, மக்களுக்குத் தேவையான 'ரியல்' நிர்வாகத்தை வழங்க முன்வர வேண்டும் என தீர்மானங்கள் வாயிலாக வலியுறுத்தப்பட்டுள்ளது.