தமிழக வெற்றிக் கழகத்தின் (தவெக) தலைவர் விஜய்யின் அரசியல் செயல்பாடுகள் திருப்திகரமாக இல்லை எனக் கூறி, அக்கட்சிக்கு அளித்து வந்த ஆதரவை ஜனநாயக முஸ்லிம் மக்கள் கட்சி அதிகாரப்பூர்வமாகத் திரும்பப் பெற்றுள்ளது. இது தொடர்பாக அக்கட்சியின் தலைவர் தமீம் வெளியிட்டுள்ள அறிவிப்பில், விஜய்யின் அரசியல் நகர்வுகள் மற்றும் செயல்பாடுகள் சரியான திசையில் இல்லை என்றும், இதனால் தவெக-விலிருந்து விலகி திமுக தலைமையிலான மதச்சார்பற்ற முற்போக்குக் கூட்டணிக்கு ஆதரவு அளிக்க முடிவு செய்துள்ளதாகவும் தெரிவித்துள்ளார்.
சட்டமன்றத் தேர்தல் நெருங்கி வரும் வேளையில், தவெக-வுக்குத் தனது ஆதரவை வழங்கியிருந்த தமீம், தற்போது திடீரென திமுக பக்கம் சாய்ந்திருப்பது அரசியல் வட்டாரத்தில் சலசலப்பை ஏற்படுத்தியுள்ளது. மேலும், வரும் தேர்தலில் திமுக கூட்டணியில் போட்டியிட வாய்ப்பு கேட்டுள்ளதாகவும் அவர் குறிப்பிட்டுள்ளார். ஏற்கனவே சிறுபான்மையினர் நலன் சார்ந்த விவகாரங்களில் தவெக-வின் நிலைப்பாடு குறித்து விவாதங்கள் எழுந்துள்ள நிலையில், இந்த ஆதரவு வாபஸ் விஜய்யின் கட்சிக்கு ஒரு பின்னடைவாகக் கருதப்படுகிறது.