தமிழக சட்டப்பேரவைத் தேர்தல் நெருங்கி வரும் வேளையில், திமுக தலைமையிலான மதச்சார்பற்ற முற்போக்குக் கூட்டணியில் தொகுதிப் பங்கீட்டை உறுதி செய்ய இந்திய கம்யூனிஸ்ட் கட்சி (CPI) தனது அதிகாரப்பூர்வக் குழுவை அறிவித்துள்ளது. அக்கட்சியின் மாநிலச் செயலாளர் மு.வீரபாண்டியன் வெளியிட்டுள்ள அறிக்கையின்படி, மாநில நிர்வாகக் குழுக் கூட்டத்தில் எடுக்கப்பட்ட முடிவின் அடிப்படையில் இந்த நான்கு பேர் கொண்ட குழு அமைக்கப்பட்டுள்ளது.
பிப்ரவரி 27-ல் முதல்கட்டப் பேச்சுவார்த்தை
இந்தக் குழுவில் மாநிலச் செயலாளர் மு.வீரபாண்டியன், மூத்த தலைவர் இரா.முத்தரசன், கே.சுப்பராயன் எம்.பி. மற்றும் கோ.பழனிசாமி ஆகியோர் இடம்பெற்றுள்ளனர். இவர்கள் வரும் பிப்ரவரி 27-ஆம் தேதி திமுக தலைமை அலுவலகமான அண்ணா அறிவாலயத்தில் முதல்கட்டப் பேச்சுவார்த்தையில் ஈடுபட உள்ளனர். ஏற்கனவே இந்திய யூனியன் முஸ்லிம் லீக் மற்றும் மனிதநேய மக்கள் கட்சி ஆகியவை திமுகவுடன் முதல்கட்டப் பேச்சுவார்த்தையை முடித்துள்ள நிலையில், தற்போது இடதுசாரிகளும் களத்தில் இறங்கியிருப்பது அரசியல் வட்டாரத்தில் எதிர்பார்ப்பை ஏற்படுத்தியுள்ளது.