சென்னையில் புறநகர் ரயில் பயணிகளின் நீண்டகாலக் கோரிக்கையை ஏற்று, இரண்டாவது குளிரூட்டப்பட்ட (AC) மின்சார ரயில் சேவையைத் தொடங்க ரயில்வே நிர்வாகம் தீவிரமான நடவடிக்கைகளை மேற்கொண்டு வருகிறது. ஏற்கனவே சென்னை கடற்கரை - செங்கல்பட்டு தடத்தில் இயக்கப்பட்டு வரும் முதல் ஏசி மின்சார ரயிலுக்குக் கிடைத்துள்ள பெரும் வரவேற்பைத் தொடர்ந்து, இந்தப் புதிய சேவை அறிமுகப்படுத்தப்பட உள்ளது.
ஐ.சி.எஃப் தயாரிப்பும் அண்ணனூர் யார்டு சோதனையும்
சென்னை பெரம்பூரில் உள்ள ஒருங்கிணைந்த ரயில் பெட்டி தொழிற்சாலையில் (ICF) 12 பெட்டிகளைக் கொண்ட இந்த இரண்டாவது ஏசி மின்சார ரயிலின் கட்டுமானப் பணிகள் இரண்டு மாதங்களுக்கு முன்பே முழுமையாக நிறைவடைந்தன. இதனைத் தொடர்ந்து, கடந்த மாதம் இந்த ரயில் சென்னை ரயில்வே கோட்டத்திடம் ஒப்படைக்கப்பட்டது. தற்போது அண்ணனூர் ரயில்வே யார்டில் நிறுத்தி வைக்கப்பட்டுள்ள இந்த ரயிலில், தொழில்நுட்ப ரீதியான பல்வேறு சோதனைகள் நடைபெற்று வருகின்றன. குறிப்பாக, சென்னை சென்ட்ரல் - அரக்கோணம் இடையேயான தண்டவாளப் பகுதியில் இந்த ரயிலை இயக்கி அதன் உறுதித்தன்மை மற்றும் பாதுகாப்பு அம்சங்கள் குறித்தும் அதிகாரிகள் ஆய்வு செய்து வருகின்றனர்.
எந்தத் தடத்தில் இயக்கப்படும்?
புதிய ஏசி மின்சார ரயிலை எந்த மார்க்கத்தில் இயக்குவது என்பது குறித்து ரயில்வே அதிகாரிகள் தீவிர ஆலோசனையில் ஈடுபட்டுள்ளனர். தினசரி சுமார் 4 லட்சம் பயணிகள் பயணிக்கும் சென்னை சென்ட்ரல் - அரக்கோணம் தடத்தில், நெரிசல் மிகுந்த நேரங்களில் (Peak Hours) கூட்டத்தைக் குறைக்க இந்த ரயிலைப் பயன்படுத்த வேண்டும் எனப் பயணிகள் தரப்பில் வலியுறுத்தப்பட்டு வருகிறது. அதே சமயம், கடற்கரை - செங்கல்பட்டு தடத்தில் கூடுதல் ஏசி ரயில் தேவை என்ற கோரிக்கையும் உள்ளது. சுமார் 4,914 பயணிகள் (1,116 பேர் அமர்ந்தும், 3,798 பேர் நின்றும்) பயணிக்கும் வசதி கொண்ட இந்த ரயிலின் சேவை குறித்து இன்னும் சில நாட்களில் இறுதி முடிவு எடுக்கப்படும் என்று சென்னை ரயில்வே கோட்ட அதிகாரிகள் தெரிவித்துள்ளனர்.