சென்னையில் பொதுமக்களின் முக்கிய போக்குவரத்து அங்கமாக மாறியுள்ள மெட்ரோ ரயில்களில், கடந்த மே மாதத்தில் மட்டும் மொத்தம் 90 லட்சத்து 14 ஆயிரத்து 959 பேர் பயணித்துள்ளனர். இதில் குறிப்பாக, மே 18-ம் தேதியன்று ஒரே நாளில் அதிகபட்சமாக 3 லட்சத்து 54 ஆயிரத்து 559 பயணிகள் மெட்ரோ ரயில்களைப் பயன்படுத்தியுள்ளனர் என்பது குறிப்பிடத்தக்கது.
பயண அட்டை மற்றும் க்யூஆர் பயன்பாடு
மெட்ரோ பயணத்திற்காகப் பயணிகள் பல்வேறு கட்டண முறைகளைக் கையாண்டுள்ளனர். அதன்படி, சிங்கார சென்னை அட்டையை 42 லட்சத்து 51 ஆயிரத்து 729 நபர்களும், மெட்ரோ பயண அட்டைகளை 1,863 பேரும் பயன்படுத்தியுள்ளனர். இதேபோல், ஒற்றை பயண பேப்பர் க்யூஆர் மூலம் 19 லட்சத்து 76 ஆயிரத்து 230 பேரும், ஆன்லைன் க்யூஆர் குறியீடு பயணச்சீட்டு முறை மூலமாக 22 லட்சத்திற்கும் அதிகமானோரும் தங்களது பயணங்களை மேற்கொண்டுள்ளனர்.
டிஜிட்டல் டிக்கெட்டுகளுக்கான சலுகை விவரம்
மெட்ரோ ரயில் நிர்வாகம் பயணிகளை டிஜிட்டல் முறையை நோக்கி ஊக்குவிக்க சிறப்பு சலுகைகளை வழங்கி வருகிறது. சிங்கார சென்னை அட்டை, டிஜிட்டல் எஸ்.வி.பி. க்யுஆர் குறியீடு, வாட்ஸ்-அப் மற்றும் ஆன்லைன் மூலம் பயணச்சீட்டு பெறுபவர்களுக்கு 20 சதவீதம் கட்டணத் தள்ளுபடி வழங்கப்படுகிறது. ஆனால், அதே நேரத்தில் மெட்ரோ ரயில் நிலைய கவுண்டர்களில் நேரடியாகப் பெறப்படும் ஒற்றைப் பயணத்திற்கான காகித க்யூஆர் டிக்கெட்டுகளுக்கு இந்த 20 சதவீதக் கட்டணத் தள்ளுபடி சலுகை பொருந்தாது என்று சென்னை மெட்ரோ ரயில் நிறுவன அதிகாரிகள் தெளிவுபடுத்தியுள்ளனர்.
Follow us on our official WhatsApp channel for breaking news alerts and updates!