கடந்த 2024-ஆம் ஆண்டு சென்னை அண்ணா பல்கலைக்கழக வளாகத்தில் தனது நண்பருடன் பேசிக்கொண்டிருந்த மாணவியை பாலியல் வன்கொடுமை செய்த வழக்கில் ஆயுள் தண்டனை பெற்ற ஞானசேகரன், தற்போது சிறையில் தனக்கு உயிருக்கு ஆபத்து இருப்பதாகக் கூறி உண்ணாவிரதப் போராட்டத்தில் ஈடுபட்டுள்ளது பரபரப்பை ஏற்படுத்தியுள்ளது.
பாலியல் வன்கொடுமை வழக்கும் ஆயுள் தண்டனைத் தீர்ப்பும்
சென்னை கிண்டியில் உள்ள புகழ்பெற்ற அண்ணா பல்கலைக்கழக வளாகத்திற்குள் புகுந்து மாணவியை வன்கொடுமை செய்ததோடு, அதனைத் தடுக்க முயன்ற மாணவியின் நண்பரைத் தாக்கிய சம்பவம் தமிழகத்தையே உலுக்கியது. இந்த வழக்கில் கைதான ஞானசேகரன் திமுகவைச் சேர்ந்தவர் என்பதும், அவர் மீது ஏற்கனவே திருட்டு வழக்குகள் இருப்பதும் விசாரணையில் அம்பலமானது. அவரிடமிருந்து சுமார் 120 பவுன் நகைகள் பறிமுதல் செய்யப்பட்டன. ஐபிஎஸ் அதிகாரிகள் அடங்கிய சிறப்புப் புலனாய்வுக் குழுவினர் இந்த வழக்கை நேர்மையான முறையில் விசாரித்து, கடந்த ஜூன் மாதம் குற்றப்பத்திரிகை தாக்கல் செய்தனர். சென்னை மகளிர் நீதிமன்றம் ஞானசேகரனுக்கு ஆயுள் தண்டனை விதித்ததைத் தொடர்ந்து, அவர் புழல் சிறையில் அடைக்கப்பட்டார்.
சிறை அதிகாரிகள் மீது புகார் மற்றும் உண்ணாவிரதப் போராட்டம்
புழல் சிறையில் தண்டனை அனுபவித்து வந்த ஞானசேகரனுக்கு, கடந்த ஏப்ரல் 19-ஆம் தேதி இரவு திடீரென வலிப்பு ஏற்பட்டதாகக் கூறப்படுகிறது. உடனடியாக அவர் சிறை மருத்துவமனையிலும், பின்னர் சென்னை ஸ்டான்லி மருத்துவமனையிலும் சிகிச்சைக்காக அனுமதிக்கப்பட்டார். இந்த நிலையில், சிறை அதிகாரிகள் தன்னைத் திட்டமிட்டுத் தாக்கி வருவதாகவும், சிறைக்குள்ளேயே தன்னைத் தீர்த்துக்கட்ட முயற்சி நடப்பதாகவும் ஞானசேகரன் பகீர் குற்றச்சாட்டை முன்வைத்துள்ளார். தனது உயிருக்கு அச்சுறுத்தல் இருப்பதாகக் கூறி, கடந்த மூன்று நாட்களாக அவர் சிறையில் உண்ணாவிரதப் போராட்டத்தில் ஈடுபட்டு வருவதாகத் தகவல்கள் வெளியாகியுள்ளன.