ஆண்டுதோறும் தடகள ரசிகர்களால் பெரிதும் எதிர்பார்க்கப்படும் 2026-ஆம் ஆண்டிற்கான தடகள கூட்டமைப்பு கோப்பை (Athletics Federation Cup) தொடரில், ஆண்களுக்கான 100 மீட்டர் ஓட்டப்பந்தயத்தில் இந்திய வீரர் குரிந்தர்வீர் சிங் புதிய தேசிய சாதனையுடன் தங்கப் பதக்கத்தைக் கைப்பற்றி அசத்தியுள்ளார். இந்த இலக்கை அவர் வெறும் 10.09 விநாடிகளில் கடந்து இந்த மாபெரும் சாதனையைத் தன்வசப்படுத்தியுள்ளார்.
இதற்கு முன்னதாக அவர் 10.17 விநாடிகளில் கடந்ததே அவரது தனிநபர் சிறந்த சாதனையாக (Personal Best) இருந்தது. தற்போதைய புதிய மைல்கல்லின் மூலம் தனது பழைய சாதனையை அவர் முறியடித்துள்ளார். அதுமட்டுமன்றி, வரவிருக்கும் காமன்வெல்த் விளையாட்டுப் போட்டிகளுக்கான தகுதி வரம்பான 10.16 விநாடிகள் என்பதையும் மிக எளிதாகக் கடந்து, இத்தொடருக்கு அவர் தகுதி பெற்றுள்ளார். இதே பிரிவில் அனிமேஷ் குஜூர் 10.20 விநாடிகளில் இலக்கை எட்டி வெள்ளிப் பதக்கத்தையும், பிரணவ் பிரமோத் 10.29 விநாடிகளில் கடந்து வெண்கலப் பதக்கத்தையும் வென்றனர்.
400 மீட்டரில் 45 விநாடி தடையை உடைத்த முதல் இந்தியர் விஷால்
ஆண்களுக்கான 400 மீட்டர் ஓட்டப்பந்தயப் பிரிவிலும் ஒரு வரலாற்றுச் சிறப்புமிக்க புதிய தேசிய சாதனை படைக்கப்பட்டுள்ளது. இப்போட்டியில் தமிழகத்தைச் சேர்ந்த தடகள வீரர் விஷால் டி.கே 44.98 விநாடிகளில் பந்தய தூரத்தைக் கடந்து தங்கப் பதக்கத்தை முத்தமிட்டுள்ளார். இதன் மூலமாக, 400 மீட்டர் ஓட்டப்பந்தய வரலாற்றிலேயே 45 விநாடிகள் என்ற இலக்கை முதன்முறையாகக் கடந்த முதல் இந்திய தடகள வீரர் என்ற இமாலயப் பெருமையையும், புதிய தேசிய சாதனையையும் விஷால் படைத்துள்ளார்.
இருப்பினும், காமன்வெல்த் விளையாட்டுப் போட்டிகளுக்கான அதிகாரப்பூர்வ தகுதி வரம்பான 44.96 விநாடிகள் என்ற இலக்கை விட வெறும் 0.02 விநாடிகள் மட்டுமே தாமதித்ததால், நூலிழையில் அவர் காமன்வெல்த் தகுதியைத் தவறவிட்டார். இந்த விறுவிறுப்பான போட்டியில் ராஜேஷ் ரமேஷ் 45.31 விநாடிகளில் கடந்து வெள்ளிப் பதக்கத்தையும், ஜெய் குமார் 45.47 விநாடிகளில் பந்தயத்தை முடித்து வெண்கலப் பதக்கத்தையும் தங்களது கணக்கில் சேர்த்தனர்.