போட்ஸ்வானாவில் நடைபெற்று வரும் 'களஹாரி மகளிர் டி20 சர்வதேச' கிரிக்கெட் தொடரில், பிரேசில் அணியின் இளம் வீராங்கனை லாரா கார்டோசோ (Lara Cardoso) உலகையே வியக்க வைக்கும் வரலாற்றுச் சாதனையை நிகழ்த்தியுள்ளார். 21 வயதான இவர், சர்வதேச டி20 கிரிக்கெட் வரலாற்றிலேயே ஒரே போட்டியில் 9 விக்கெட்டுகளை வீழ்த்திய முதல் வீரர் (ஆண்கள் மற்றும் பெண்கள் பிரிவு உட்பட) என்ற பெருமையைப் பெற்றுள்ளார்.
மிரட்டிய பந்துவீச்சு - நிலைகுலைந்த லெசோதோ
நேற்று நடைபெற்ற லெசோதோ (Lesotho) அணிக்கு எதிரான போட்டியில் பிரேசில் மகளிர் அணி முதலில் பேட்டிங் செய்து 20 ஓவர்களில் 202 ரன்கள் குவித்தது. கடினமான இலக்கை நோக்கி விளையாடிய லெசோதோ அணி, லாராவின் அனல் பறக்கும் பந்துவீச்சை எதிர்கொள்ள முடியாமல் திணறியது. வெறும் 6.2 ஓவர்களில் அந்த அணி 13 ரன்களுக்குச் சுருண்டது. இதில் ஆச்சரியமான விஷயம் என்னவென்றால், லெசோதோ அணியின் 7 வீராங்கனைகள் ரன் ஏதுமின்றி 'டக் அவுட்' ஆகினர்.
முறியடிக்கப்பட்ட முந்தைய சாதனைகள்
இதற்கு முன்பு சர்வதேச டி20 போட்டிகளில் சோனம் யேஷே 8 விக்கெட்டுகளை வீழ்த்தியதே சாதனையாக இருந்தது. தற்போது அந்தச் சாதனையைத் தகர்த்துள்ள லாரா கார்டோசோ, 9 விக்கெட்டுகளைக் கைப்பற்றி புதிய மைல்கல்லை எட்டியுள்ளார். மகளிர் கிரிக்கெட்டில் வளர்ந்து வரும் நாடான பிரேசிலில் இருந்து ஒரு வீராங்கனை இத்தகைய உலகச் சாதனையைப் படைத்துள்ளது சர்வதேச கிரிக்கெட் வட்டாரத்தில் பெரும் கவனத்தை ஈர்த்துள்ளது.