பிரேசிலில் நடைபெற்ற 'கேம்பியோனாடோ மினீரோ' கால்பந்து தொடரின் இறுதிப்போட்டி, வரலாறு காணாத வன்முறை மற்றும் மோதல்களால் போர்க்களமாக மாறியது. குரூஸாரோ (Cruzeiro) மற்றும் அட்லெடிகோ மினீரோ (Atletico Mineiro) அணிகளுக்கு இடையிலான இந்த ஆட்டத்தின் கடைசி நிமிடங்களில் ஏற்பட்ட மோதலைக் கட்டுப்படுத்த ராணுவ போலீஸார் களம் இறங்க வேண்டிய சூழல் உருவானது. இந்த வன்முறைச் சம்பவத்தைத் தொடர்ந்து, இரண்டு அணிகளையும் சேர்ந்த மொத்தம் 23 வீரர்களுக்கு நடுவர் 'ரெட் கார்டு' (Red Card) காட்டி வெளியேற்றினார்.
ஆட்டத்தின் இறுதியில் குரூஸாரோ வீரர் கிறிஸ்டியன், அட்லெடிகோ கோல்கீப்பர் எவர்சனை முட்டித் தள்ளியதே இந்த மோதலுக்குத் தொடக்கப்புள்ளியாக அமைந்தது. இதனால் ஆத்திரமடைந்த கோல்கீப்பர், எதிரணி வீரரை ரக்பி பாணியில் கீழே தள்ளித் தாக்கியது மைதானத்தில் பெரும் கலவரத்தைத் தூண்டியது. மாற்று வீரர்கள், பயிற்சியாளர்கள் மற்றும் பாதுகாப்புப் பணியாளர்கள் என அனைவரும் ஒருவரை ஒருவர் சரமாரியாகத் தாக்கிக் கொண்டனர். இதில் பிரேசில் அணியின் முன்னாள் நட்சத்திர வீரர் ஹல்க் (Hulk) ஒரு வீரரைத் தலையில் தாக்குவதும், பின்னர் அவர் மார்பில் உதைக்கப்படுவதும் போன்ற காட்சிகள் சமூக வலைதளங்களில் வைரலாகி வருகின்றன.
இந்தச் சம்பவத்திற்கு வருத்தம் தெரிவித்துள்ள ஹல்க், "கால்பந்து விளையாட்டு சொல்லித்தரும் பாடம் இதுவல்ல; குழந்தைகளுக்கு நாங்கள் தவறான முன்மாதிரியாகிவிட்டோம்" எனத் தனது இன்ஸ்டாகிராம் பக்கத்தில் பதிவிட்டுள்ளார். இறுதியாக குரூஸாரோ அணி 1-0 என்ற கணக்கில் வெற்றி பெற்று சாம்பியன் பட்டத்தைக் கைப்பற்றினாலும், 23 வீரர்கள் வெளியேற்றப்பட்ட இந்தச் சம்பவம் கால்பந்து வரலாற்றில் ஒரு கருப்புப் புள்ளியாக மாறியுள்ளது.