இந்திய கலாச்சாரத்தில் கூட்டுக்குடும்பமாக வாழ்வது என்பது காலங்காலமாகப் பின்பற்றப்பட்டு வந்த ஒரு உன்னதமான பாரம்பரியமாகும். ஆனால், தற்போதைய நவீன காலகட்டத்தில் இந்த நிலைமை முற்றிலும் தலைகீழாக மாறிவிட்டது. பெரும்பாலான மக்கள் தனித்து சுதந்திரமாக வாழவே விரும்புகின்றனர். குறிப்பாக, திருமணம் முடிந்த கையோடு தங்களது பெற்றோரை விட்டுப் பிரிந்து, கணவன்-மனைவி எனத் தனிக் குடித்தனம் செல்வதே இன்றைய பொதுவான வழக்கமாகிவிட்டது.
உலகிலேயே பெரிய குடும்பம்
இப்படிப்பட்ட சூழலிலும், நூற்றுக்கணக்கான உறுப்பினர்களைத் தன்னுள் கொண்டு, உலகிலேயே மிகப்பெரிய குடும்பம் என்ற வரலாற்றுச் சாதனையைப் படைத்துள்ளது இந்தியாவின் ஒரு விசித்திரக் குடும்பம். இந்தியாவின் வடகிழக்கு மாநிலமான மிசோரமைச் சேர்ந்த நபர் ஒருவர், 39 மனைவிகள் மற்றும் 94 பிள்ளைகளுடன் இந்த பிரம்மாண்ட உலக சாதனைப் பின்னணியைக் கொண்டுள்ளார். மிசோரமின் பக்தவங் பகுதியைச் சேர்ந்த ஜியோனா சனா என்பவரது குடும்பமே இந்த அரிய பெருமைக்குரியதாகும்.
ஜியோனா சனாவின் அசுரப் பின்னணி
கடந்த 2021 ஆம் ஆண்டில், தனது 76 ஆவது வயதில் ஜியோனா சனா காலமானார். அவர் முதன்முதலில் தனது 17 ஆவது வயதில் இல்லற வாழ்க்கையில் கால் பதித்தார். அதனைத் தொடர்ந்து, அவர் அடுத்தடுத்து 38 முறை பல்வேறு பெண்களைத் திருமணம் செய்து கொண்டார். இதன் விளைவாக, அவர் உயிர் பிரிந்த சமயத்தில் அவருக்கு 39 மனைவிகள், 94 பிள்ளைகள், 14 மருமகள்கள் மற்றும் 33 பேரப்பிள்ளைகள் இருந்தனர். இவ்வாறு ஜியோனா சனாவின் வாரிசுகள் எனச் சுமார் 200 பேர் தற்போதும் ஒரே கூரையின் கீழ் வாழ்ந்து வருகின்றனர்.
100 அறைகள் கொண்ட மாளிகை
இத்தனை பெரிய குடும்பத்தைச் சேர்ந்தவர்களும் ஒன்றாகத் தங்குவதற்கு ஏதுவாக, அந்த வீட்டில் சுமார் 100 அறைகள் கட்டப்பட்டுள்ளன. இதன் காரணமாக இந்தக் குடும்பம், ஒரு சாதாரணக் குடும்பத்தைப் போல் அல்லாமல் ஒரு தனிச் சமுதாயத்தைப் போலவே இயங்கி வருகிறது. பல தலைமுறையினர் ஒரே வீட்டில் வசித்தாலும், அவர்கள் தங்களுக்குள் எவ்விதப் பாகுபாடுமின்றிப் பொறுப்புகளையும், அன்றாடக் கடமைகளையும் சமமாகப் பகிர்ந்துகொள்கின்றனர்.
ஒரு நாள் சாப்பாட்டு பட்ஜெட்
இவ்வளவு பெரிய எண்ணிக்கையில் இருக்கும் உறுப்பினர்கள் தினசரி உணவு உண்பதற்காகவே இந்தக் குடும்பம் மிகப்பெரிய அளவில் செலவு செய்ய வேண்டியுள்ளது. உதாரணமாக, இந்த ஒட்டுமொத்தக் குடும்பமும் ஒரு நாளைக்குச் சாப்பிடுவதற்கு 45 முதல் 90 கிலோ அரிசி, 40 கிலோ உருளைக்கிழங்கு, 25 கிலோ காய்கறிகள் மற்றும் 20 கிலோ பருப்பு ஆகியவை தேவைப்படுகின்றன. அதுவே அசைவ உணவு சமைக்கும் நாளாக இருந்தால், ஒரு வேளைக்கு மட்டும் 30 முதல் 35 கோழிகள் தேவைப்படுமாம். இந்த இமாலயக் குடும்பத்தைப் பராமரிக்க, அங்குள்ளவர்கள் தங்களுக்குரிய பணிகளைத் தாங்களே பிரித்துக் கொண்டு திறம்படச் செய்து வருவது அனைவரையும் வியப்பில் ஆழ்த்தியுள்ளது.