கடந்த 2019ஆம் ஆண்டு தான் பத்தாம் வகுப்பு படித்துக் கொண்டிருந்த போது, பக்கத்து வீட்டில் வசித்து வந்த தசரத் பட்டேல் (60) என்ற முதியவர் தன்னைத் தனது பேத்தாலஜி மையத்திற்கு அழைத்துச் சென்று பாலியல் வன்கொடுமை செய்ததாகப் பாதிக்கப்பட்ட பெண் காவல் நிலையத்தில் புகார் அளித்துள்ளார். கோச்சிங் சென்டர் திறப்பதற்காக வாசலில் காத்திருந்த வேளையில் இந்த கொடூரம் அரங்கேறியதாக அவர் தனது புகாரில் குறிப்பிட்டுள்ளார்.
மிரட்டிப் பணிய வைத்த 6 ஆண்டு கால தொடர் துன்புறுத்தல்
அந்தப் புகாரில், 2019ஆம் ஆண்டு நடந்த இந்த சம்பவத்திற்குப் பிறகு, தசரத் பட்டேல் தன்னைத் தொடர்ந்து மிரட்டியும், பிளாக்மெயில் செய்தும் கடந்த 2025ஆம் ஆண்டு வரை பல ஆண்டுகளாகத் தொடர்ந்து பாலியல் ரீதியாகத் துன்புறுத்தி வந்ததாக அந்தப் பெண் குற்றம் சாட்டியுள்ளார். இந்த தொடர் அச்சுறுத்தல் காரணமாகப் பயந்துபோய் யாரிடமும் கூற முடியாமல் அவர் தவித்து வந்துள்ளார்.
துணையாக நின்ற கணவர்: பாய்ந்தது போக்சோ சட்டம்
இந்தச் சூழலில், கடந்த ஏப்ரல் 2026இல் அந்தப் பெண்ணிற்குத் திருமணம் நடைபெற்றுள்ளது. திருமணத்திற்குப் பிறகு தனக்கு நேர்ந்த கொடூரமான கொடுமைகளைத் தனது கணவரிடம் அவர் கண்ணீருடன் விவரித்துள்ளார். இதைக் கேட்டு அதிர்ச்சியடைந்த கணவர், தனது மனைவிக்கு நீதி கிடைக்க வேண்டும் என்பதில் உறுதியாக இருந்து, அவருடன் இணைந்து காவல்துறை உயர் அதிகாரிகளை அணுகிப் புகார் அளித்துள்ளார்.
இதனைத் தொடர்ந்து, மிர்சாமுராத் காவல் நிலைய பொறுப்பதிகாரி கோபால்ஜி குஷ்வாஹா, குற்றம் சாட்டப்பட்ட தசரத் பட்டேல் மீது பாரதிய நியாய சன்ஹிதா (BNS) மற்றும் போக்சோ (POCSO) சட்டத்தின் கீழ் வழக்குப் பதிவு செய்துள்ளதாகத் தெரிவித்தார். தலைமறைவாக உள்ள முதியவரைக் கைது செய்யத் தனிப்படைகள் அமைக்கப்பட்டுள்ளதாகவும், அவர் விரைவில் சிறையில் அடைக்கப்படுவார் என்றும் காவல்துறை தரப்பில் தெரிவிக்கப்பட்டுள்ளது.