மேற்கு வங்க மாநிலம் பால்டா சட்டமன்றத் தொகுதியில் நடைபெற்ற வாக்குப்பதிவின் போது ஜனநாயக நெறிமுறைகளுக்கு முரணாக பல்வேறு முறைகேடுகள் நடைபெற்றதை அடுத்து, அங்குள்ள மொத்தம் 285 வாக்குச் சாவடிகளிலும் மறுதேர்தல் நடத்த இந்தியத் தேர்தல் ஆணையம் அதிரடி உத்தரவைப் பிறப்பித்துள்ளது. இதன்படி, மே 21-ஆம் தேதி மீண்டும் வாக்குப்பதிவு நடத்தப்பட்டு, மே 24-ஆம் தேதி முடிவுகள் அறிவிக்கப்படும் எனத் தெரிவிக்கப்பட்டுள்ளது. இதன் காரணமாக, மேற்கு வங்கத்தில் இன்று பால்டா தவிர்த்த மற்ற 293 தொகுதிகளுக்கு மட்டுமே வாக்கு எண்ணிக்கை நடைபெறுகிறது. வாக்குப்பதிவு இயந்திரங்களில் குறிப்பிட்ட சின்னங்களுக்கு நேராக கறுப்பு நிற டேப் ஒட்டி முடக்கியது முதல், வாக்காளர்களைக் கண்டறிய வாசனைத் திரவியங்களைப் பயன்படுத்தியது வரை அதிர்ச்சியூட்டும் பல தகவல்களைத் தேர்தல் ஆணையம் வெளிப்படுத்தியுள்ளது.
அரங்கேறிய தேர்தல் முறைகேடுகள்
பால்டா தொகுதியில் முறையான வாக்காளர்களை வாக்களிக்க விடாமல் தடுத்ததோடு, மின்னணு இயந்திரங்களில் சில வேட்பாளர்களின் பொத்தான்களை அழுத்த முடியாதபடி கறுப்பு டேப் மூலம் மறைத்து முறைகேடு செய்யப்பட்டுள்ளது. மேலும், இயந்திரத்தின் பொத்தான்களில் மையைத் தடவி, வாக்களித்து வரும் நபர்களின் விரல்களில் ஏற்படும் வாசனை மற்றும் நிறத்தை வைத்து அவர்கள் யாருக்கு வாக்களித்தார்கள் என்பதைக் கண்டறியும் சட்டவிரோதச் செயல்களும் அரங்கேறியுள்ளன. இது வாக்களிப்பதன் ரகசியத்தன்மையை முழுமையாகச் சிதைப்பதாக ஆணையம் சுட்டிக்காட்டியுள்ளது. தொகுதி முழுவதும் பரவலாக வாக்குச் சாவடிகள் கைப்பற்றப்பட்டதையும், தேர்தல் அலுவலர்களே முறைகேடுகளுக்குத் துணை நின்றதையும் வீடியோ பதிவுகள் உறுதி செய்துள்ளன. திட்டமிட்டபடி சிசிடிவி கேமராக்கள் அணைக்கப்பட்டதும், வீடியோ பதிவுகள் மாயமானதும் முறைகேடுகளை மறைக்க நடந்த முயற்சிகளை உறுதிப்படுத்தியுள்ளன. கள்ள ஓட்டுகள் மற்றும் ரகசியக் காப்பு விதிகள் மீறப்பட்டதால் நம்பகத்தன்மையை இழந்த பால்டா தொகுதியின் தேர்தலை ரத்து செய்து, முழுமையான மறுதேர்தலை நடத்த ஆணையம் முடிவெடுத்துள்ளது.