அரசு நிகழ்ச்சிகளில் வந்தே மாதரம் பாடலின் ஆறு சரணங்களையும் முழுமையாகப் பாட வேண்டும் என்ற மத்திய அரசு அறிவிப்புக்கு சில இஸ்லாமிய அமைப்புகள் எதிர்ப்பு தெரிவித்துள்ளன. இந்த உத்தரவு மதச் சுதந்திரத்திற்கு முரணானது என அவை கூறியுள்ளன.
இஸ்லாமிய அமைப்புகள் எதிர்ப்பு – வழக்கு தொடர முடிவு
ஜமியத் உலேமா-இ-ஹிந்த் மற்றும் அகில இந்திய முஸ்லிம் தனிநபர் சட்ட வாரியம் உள்ளிட்ட அமைப்புகள், பாடலின் சில வரிகள் தாயகத்தை தெய்வமாக சித்தரிப்பதாகவும், அது இஸ்லாமிய ஓரிறை கொள்கைக்கு முரணானது என்றும் தெரிவித்துள்ளன. உத்தரவை திரும்பப் பெறாவிட்டால் உச்ச நீதிமன்றம் வழியாக சட்ட நடவடிக்கை எடுக்கப்படும் எனவும் எச்சரித்துள்ளன.
வரலாறு மற்றும் புதிய வழிகாட்டுதல்கள்
வங்க மொழிக் கவிஞர் பங்கிம் சந்திர சட்டர்ஜி எழுதிய இந்த பாடல், 1950ஆம் ஆண்டு தேசியப் பாடலாக அறிவிக்கப்பட்டது. பாடல் இயற்றப்பட்டு 150 ஆண்டுகள் நிறைவடைந்ததை முன்னிட்டு அரசு விழாக்கள் மற்றும் கல்வி நிறுவனங்களில் பாட வழிகாட்டுதல்கள் வெளியிடப்பட்டுள்ளன. பாடல் இசைக்கப்படும் போது அனைவரும் எழுந்து நிற்க வேண்டும் என்றும் அறிவுறுத்தப்பட்டுள்ளது.
யோகி ஆதித்யநாத் கருத்து
இதுகுறித்து யோகி ஆதித்யநாத், வந்தே மாதரத்தை எதிர்ப்பவர்களை கடுமையாக விமர்சித்துள்ளார். தேசிய உணர்வை மதிக்க வேண்டும் என்றும், சில அரசியல் கட்சிகள் இதை அரசியல் பிரச்சினையாக மாற்றுகின்றன என்றும் அவர் தெரிவித்துள்ளார்.