நாடாளுமன்ற மாநிலங்களவை உறுப்பினர்களாகத் தேர்ந்தெடுக்கப்பட்ட தமிழகத்தைச் சேர்ந்த அன்புமணி ராமதாஸ், திருச்சி சிவா உள்ளிட்ட 19 புதிய உறுப்பினர்கள் இன்று (ஏப்ரல் 6) அதிகாரப்பூர்வமாகப் பதவியேற்றுக் கொண்டனர். டெல்லியில் நடைபெற்ற இந்த விழாவில், மாநிலங்களவைத் தலைவர் சி.பி. ராதாகிருஷ்ணன் முன்னிலையில் உறுப்பினர்கள் அனைவரும் பதவியேற்பு உறுதிமொழியை எடுத்துக் கொண்டனர். இந்த நிகழ்வின் போது மாநிலங்களவைத் துணைத் தலைவர் ஹரிவன்ஷ் மற்றும் நாடாளுமன்ற விவகாரங்கள் துறை அமைச்சர் கிரண் ரிஜிஜு ஆகியோர் உடனிருந்தனர்.
தமிழகப் பிரதிநிதிகள்
தமிழகத்திலிருந்து மொத்தம் 6 பேர் இன்று மாநிலங்களவை உறுப்பினர்களாகப் பொறுப்பேற்றனர். திமுக சார்பில் திருச்சி சிவா மற்றும் கான்ஸ்டன்டைன் ரவீந்திரன், அதிமுக சார்பில் தம்பிதுரை, பாமக சார்பில் அன்புமணி ராமதாஸ், தேமுதிக சார்பில் எல்.கே. சுதிஷ் மற்றும் காங்கிரஸ் சார்பில் கிறிஸ்டோபர் மாணிக்கம் ஆகியோர் தமிழகத்தின் குரலாக மாநிலங்களவையில் தடம் பதித்தனர். பதவியேற்ற உறுப்பினர்களில் பெரும்பாலானோர் தங்களது தாய்மொழியான தமிழிலேயே உறுதிமொழி எடுத்துக் கொண்டது குறிப்பிடத்தக்கது.
மாநில வாரியான விபரம்
தமிழகத்தைத் தவிர்த்து மகாராஷ்டிரா மற்றும் மேற்கு வங்க மாநிலங்களிலிருந்து தலா ஐந்து பேரும், ஒடிசாவிலிருந்து மூன்று பேரும் என மொத்தம் 19 பேர் இன்று பதவியேற்றனர். மகாராஷ்டிராவிலிருந்து சரத் பவார், மத்திய அமைச்சர் ராம்தாஸ் அதாவலே உள்ளிட்டோரும், மேற்கு வங்கத்திலிருந்து பாபுல் சுப்ரியா பரல், மேனகா குருசாமி உள்ளிட்டோரும், ஒடிசாவிலிருந்து மன்மோகன் சமல் உள்ளிட்டோரும் உறுப்பினர்களாகப் பொறுப்பேற்றனர். புதிதாகப் பதவியேற்ற அனைத்து உறுப்பினர்களுக்கும் அவைத் தலைவர் சி.பி. ராதாகிருஷ்ணன் தனது வாழ்த்துகளைத் தெரிவித்தார்.