புதுச்சேரி முத்தியால்பேட்டை பகுதியில் கடந்த 2024-ம் ஆண்டு மார்ச் 2-ம் தேதி விளையாடிக் கொண்டிருந்த 5-ம் வகுப்பு சிறுமி மர்மமான முறையில் காணாமல் போனார். இது குறித்துப் பெற்றோர் அளித்த புகாரின் பேரில் தேடுதல் வேட்டையைத் தொடங்கிய காவல்துறையினருக்கு, இரண்டு நாட்களுக்குப் பிறகு அந்தப் பகுதியில் உள்ள ஒரு வாய்க்காலில் மூட்டையில் கட்டப்பட்ட நிலையில் சிறுமியின் உடல் கண்டெடுக்கப்பட்டது பெரும் அதிர்ச்சியை ஏற்படுத்தியது. கதிர்காமம் அரசு மருத்துவமனையில் செய்யப்பட்ட உடற்கூறாய்வில், சிறுமி பாலியல் வன்கொடுமைக்கு உள்ளாக்கப்பட்டு மிகவும் கொடூரமான முறையில் கொலை செய்யப்பட்டது உறுதி செய்யப்பட்டது. இதனைத் தொடர்ந்து தீவிர விசாரணை நடத்திய போலீசார், கண்காணிப்பு கேமரா ஆதாரங்களின் அடிப்படையில் விவேகானந்தன் மற்றும் கருணாஸ் ஆகிய இருவரைக் கைது செய்து சிறையில் அடைத்தனர்.
குற்றவாளி என உறுதி செய்யப்பட்ட தீர்ப்பு
இந்த வழக்கு விசாரணையின் போது முதல் குற்றவாளியான விவேகானந்தன் சிறையிலேயே தற்கொலை செய்து கொண்ட நிலையில், மற்றொரு குற்றவாளியான கருணாஸ் மீதான விசாரணை புதுச்சேரி போக்சோ சிறப்பு நீதிமன்றத்தில் தொடர்ச்சியாக நடைபெற்று வந்தது. பல்வேறு கட்ட வாதங்கள் மற்றும் ஆதாரங்களைப் பரிசீலித்த நீதிமன்றம், சிறுமி கொலை வழக்கில் கருணாஸ் மீதான குற்றச்சாட்டுகள் சந்தேகத்திற்கு இடமின்றி நிரூபிக்கப்பட்டுள்ளதாகக் கூறி அவரை குற்றவாளி எனத் தீர்ப்பளித்தது. இதனைத் தொடர்ந்து, அவருக்கான தண்டனை விவரங்கள் வரும் மே 5-ம் தேதி அதிகாரப்பூர்வமாக அறிவிக்கப்படும் என்று நீதிபதி தெரிவித்துள்ளார். இந்தத் தீர்ப்பு புதுச்சேரி மக்களிடையே பெரும் வரவேற்பைப் பெற்றுள்ளது.