பிரதமர் மோடி, இரண்டு நாள் அரசுமுறைப் பயணமாக இன்று இஸ்ரேல் புறப்பட்டார். 2017-ம் ஆண்டிற்குப் பிறகு அவர் மேற்கொள்ளும் இரண்டாவது இஸ்ரேல் பயணம் இதுவாகும். இந்தப் பயணத்தின் மூலம் இரு நாடுகளுக்கும் இடையிலான 'மூலோபாய கூட்டாண்மையை' (Strategic Partnership) அடுத்த கட்டத்திற்கு கொண்டு செல்லவும், அறிவியல், தொழில்நுட்பம், பாதுகாப்பு, விவசாயம் மற்றும் நீர் மேலாண்மை உள்ளிட்ட துறைகளில் ஒத்துழைப்பை அதிகரிக்கவும் திட்டமிடப்பட்டுள்ளது.
இஸ்ரேலிய நாடாளுமன்றத்தில் உரையாற்றுகிறார்
இஸ்ரேல் பிரதமர் பெஞ்சமின் நெதன்யாகுவுடன் இணைந்து பல்வேறு புரிந்துணர்வு ஒப்பந்தங்களில் பிரதமர் மோடி கையெழுத்திட உள்ளார். குறிப்பாக, இஸ்ரேலிய நாடாளுமன்றமான 'கினசெட்' (Knesset) அவையில் உரையாற்றும் முதல் இந்தியப் பிரதமர் என்ற பெருமையை அவர் பெறுகிறார். இது இரு நாடுகளின் ஜனநாயக உறவுகளுக்குக் கிடைக்கும் அங்கீகாரம் என்று மோடி பெருமிதத்துடன் குறிப்பிட்டுள்ளார்.
நட்பும் ஒத்துழைப்பும்
பிரதமர் மோடியை தனது "நெருங்கிய நண்பர்" என்று வரவேற்றுள்ள இஸ்ரேல் பிரதமர் நெதன்யாகு, செயற்கை நுண்ணறிவு (AI), குவாண்டம் கம்ப்யூட்டிங் மற்றும் ஹை-டெக் துறைகளில் இந்தியாவுடன் இணைந்து செயல்பட ஆர்வமாக இருப்பதாகத் தெரிவித்துள்ளார். மேலும், இந்தப் பயணத்தின் போது இஸ்ரேலிய அதிபர் ஐசக் ஹெர்சோக் மற்றும் அங்குள்ள இந்திய வம்சாவளியினரையும் பிரதமர் மோடி சந்திக்க உள்ளார்.