பீகார் அரசியலில் ஒரு முக்கிய திருப்பமாக, முதலமைச்சர் நிதிஷ் குமாரின் மகன் நிஷாந்த் குமார் (50) தனது தந்தையின் கட்சியான ஐக்கிய ஜனதா தளத்தில் (ஜேடியு) அதிகாரப்பூர்வமாக உறுப்பினராக இணைந்துள்ளார். நீண்ட காலமாக அரசியலில் இருந்து ஒதுங்கியிருந்த நிஷாந்த் குமார், தற்போது கட்சியின் மூத்த தலைவர்கள் முன்னிலையில் தன்னை ஒரு தீவிர உறுப்பினராக இணைத்துக்கொண்டார். நிதிஷ் குமாரின் உடல்நிலை பாதிப்பு மற்றும் அவர் மாநிலங்களவைத் தேர்தலில் போட்டியிட முடிவு செய்துள்ள சூழலில், தனது மகனை அரசியல் வாரிசாகக் களமிறக்க அவர் திட்டமிட்டுள்ளதாகத் தெரிகிறது. பாஜக தலைமையுடன் நடத்தப்பட்ட ஆலோசனையின்படி, முதலமைச்சர் பதவியை பாஜக-விற்கு விட்டுக்கொடுத்துவிட்டு, நிஷாந்த் குமாரை துணை முதலமைச்சராக்க ஜேடியு எம்.எல்.ஏ-க்கள் மற்றும் எம்.பி-க்கள் ஒருமனதாக ஆதரவு தெரிவித்துள்ளனர்.
கட்சியில் இணைந்த பிறகு ஜெயப்பிரகாஷ் நாராயண் சிலைக்கு மாலை அணிவித்து மரியாதை செலுத்திய நிஷாந்த் குமார், கட்சியின் நலனைப் பாதுகாப்பதில் உறுதியாக இருப்பேன் என்றும், தனது தந்தையின் முடிவை மதிப்பதாகவும் செய்தியாளர்களிடம் தெரிவித்தார். இந்த இணைப்பு விழாவில் முதலமைச்சர் நிதிஷ் குமார் பங்கேற்கவில்லை என்றாலும், கட்சியின் செயல் தலைவர் சஞ்சய் ஜா உள்ளிட்ட முக்கியப் பிரமுகர்கள் உடனிருந்தனர். நிதிஷ் குமார் தேசிய அரசியலுக்கு நகரும் பட்சத்தில், பீகார் மாநில அரசியலில் நிஷாந்த் குமார் ஒரு முக்கியப் பொறுப்பை ஏற்பது கிட்டத்தட்ட உறுதியாகியுள்ளது. இது பீகார் அரசியலில் புதிய அதிகாரப் பகிர்விற்கும், வாரிசு அரசியல் குறித்த விவாதங்களுக்கும் வழிவகுத்துள்ளது.