தமிழகம் மற்றும் புதுச்சேரிக்கு இரண்டு நாள் பயணமாக வருகை தந்துள்ள பாரதப் பிரதமர் நரேந்திர மோடி, இன்று புதுவையில் நடைபெற்ற அரசு விழாவில் கலந்துகொண்டார். சுமார் 2,700 கோடி ரூபாய் மதிப்பிலான பல்வேறு நலத்திட்டங்களைத் தொடங்கி வைத்த பிரதமர், புதுச்சேரி மற்றும் காரைக்கால் பகுதிகளில் போக்குவரத்து நெரிசலைக் குறைக்க 440 கோடி ரூபாய் செலவில் கட்டப்பட்டு வரும் மேம்பாலப் பணிகளையும் சுட்டிக்காட்டினார். விழாவின் தொடக்கத்தில், புதுச்சேரி முதலமைச்சர் ரங்கசாமி பிரதமருக்கு 'வேல்' ஒன்றைப் பரிசளித்து உற்சாகமாக வரவேற்றார்.
காங்கிரஸ் - திமுக கூட்டணி மீது கடும் சாடல்
விழாவில் உரையாற்றிய பிரதமர் மோடி, தற்போதைய என்.டி.ஏ (NDA) ஆட்சியில் புதுச்சேரி கல்வி, ஆன்மிகம் மற்றும் சுற்றுலாத் துறைகளில் அபரிமிதமான வளர்ச்சி கண்டுள்ளதாகப் பாராட்டினார். அதே வேளையில் எதிர்க்கட்சிகளைச் சாடிய அவர், "இதற்கு முன்பு புதுச்சேரியை ஆண்ட காங்கிரஸ் மற்றும் திமுக கூட்டணி ஆட்சியில் மக்கள் கடும் அவதிக்குள்ளாகினர். முந்தைய ஆட்சியாளர்கள் புதுச்சேரியைத் தங்கள் கட்சியின் 'ஏடிஎம்' (ATM) போலத்தான் பயன்படுத்தி வந்தனர். ஆனால் இன்று மத்திய-மாநில அரசுகள் இணைந்து ஒரு முன்மாதிரி மாநிலமாகப் புதுவையை மாற்றியுள்ளன" என்று பேசினார்.
மேடையிலேயே மாநில அந்தஸ்து கோரிய ரங்கசாமி
பிரதமர் மோடியின் பாராட்டுகளுக்கு நன்றி தெரிவித்துப் பேசிய முதலமைச்சர் ரங்கசாமி, புதுச்சேரியின் உள்கட்டமைப்பு மற்றும் மக்கள் நலத்திட்டங்களுக்குப் பிரதமர் அளிக்கும் ஆதரவை நெகிழ்வுடன் குறிப்பிட்டார். எனினும், நீண்ட காலக் கோரிக்கையான 'மாநில அந்தஸ்து' குறித்துப் பிரதமரிடம் நேரிடையாக வேண்டுகோள் விடுத்தார். "மத்திய அரசின் பட்ஜெட் உதவியால் பல நன்மைகள் நடந்தாலும், புதுச்சேரிக்கு மாநில அந்தஸ்து கிடைக்காமல் இருப்பது எங்களுக்கு வருத்தத்தைத் தருகிறது. புதுவை மக்களின் நீண்ட நாள் விருப்பத்தை ஏற்று, எங்களுக்கு மாநில அந்தஸ்து வழங்கிட வேண்டும்" என மிகத் தாழ்மையுடன் பிரதமரிடம் கோரிக்கை வைத்தார்.