கணவனின் சகோதரியையே இரண்டாவது மனைவியாக்கிய மனைவி: விவாகரத்து பெற நீதிமன்றத்தில் அரங்கேறிய நூதன மோசடி!

பொதுவாக தம்பதியினர் விவாகரத்து கோரி நீதிமன்றத்தை அணுகும்போது குடும்ப வன்முறை, வரதட்சணை கொடுமை அல்லது கருத்து வேறுபாடுகளைத் தான் காரணமாகக் கூறுவார்கள். ஆனால், மத்தியப் பிரதேசத்தில் ஒரு பெண் தனது கணவரிடமிருந்து விவாகரத்து பெற கையாண்ட விசித்திரமான முறை நீதிமன்றத்தையே அதிரவைத்துள்ளது. தனது கணவரின் சொந்தச் சகோதரியையே, அவருக்கு இரண்டாவது மனைவி என்று நீதிமன்றத்தில் அடையாளப்படுத்தி அந்தப் பெண் விவாகரத்து பெற்றுள்ளார்.

குடும்பப் புகைப்படம் மூலம் அரங்கேறிய மோசடி

குவாலியரைச் சேர்ந்த இந்த தம்பதியினருக்கு கடந்த 1998-ஆம் ஆண்டு திருமணம் நடைபெற்றது. சந்தைப்படுத்தல் நிறுவனத்தில் பணியாற்றிய கணவர், வேலை நிமித்தமாக அடிக்கடி வெளியூர் சென்று தங்கியதால் தம்பதியிடையே பிளவு ஏற்பட்டுள்ளது. இதனால் 2015 முதல் அந்தப் பெண் பிரிந்து வாழத் தொடங்கினார். எப்படியாவது விவாகரத்து பெற விரும்பிய அந்தப் பெண், 2021-ல் குடும்ப நீதிமன்றத்தை அணுகி தனது கணவர் இரண்டாவது திருமணம் செய்துகொண்டதாகக் குற்றம் சாட்டினார். அதற்கு ஆதாரமாக ஒரு குடும்பப் புகைப்படத்தை நீதிமன்றத்தில் சமர்ப்பித்தார். அதில் தனது கணவருக்கு அருகில் நின்றிருந்த பெண்ணை அவரது 'இரண்டாவது மனைவி' என்று அவர் அடையாளப்படுத்தினார்.

ஒருதலைப்பட்சமான தீர்ப்பும் வெளிவந்த உண்மையும்

அந்தப் பெண் வழங்கிய புகைப்பட ஆதாரத்தை அடிப்படையாகக் கொண்டு, குவாலியர் குடும்ப நீதிமன்றம் கணவரின் தரப்பு விளக்கத்தைக் கேட்காமலேயே ஒருதலைப்பட்சமாக விவாகரத்து வழங்கி உத்தரவிட்டது. இந்த விவகாரம் கடந்த ஏப்ரல் முதல் வாரத்தில் கணவருக்குத் தெரியவந்தபோது அவர் பேரதிர்ச்சியடைந்தார். நீதிமன்ற ஆவணங்களைச் சரிபார்த்தபோது, தனது சகோதரியுடன் எடுத்துக்கொண்ட புகைப்படத்தை வைத்து, அவரே இரண்டாவது மனைவி என்று கூறி தனது மனைவி மோசடி செய்திருப்பதை அவர் கண்டறிந்தார்.

உயர் நீதிமன்றத்தில் மேல்முறையீடு

தவறான ஆதாரங்களை அளித்து நீதிமன்றத்தை அந்தப் பெண் ஏமாற்றியுள்ளதாகக் கூறி, தற்போது கணவர் மத்தியப் பிரதேச உயர் நீதிமன்றத்தின் குவாலியர் கிளையில் மேல்முறையீடு செய்துள்ளார். இது குறித்து அரசு வழக்கறிஞர் தர்மேந்திர சர்மா கூறுகையில், "தனது மனைவியின் பொய்யான வாதத்தால் வழங்கப்பட்ட இந்த விவாகரத்து உத்தரவை ரத்து செய்ய வேண்டும் என்று கணவர் மனு தாக்கல் செய்துள்ளார்" எனத் தெரிவித்தார். இந்த வழக்கின் பின்னணியில் உள்ள உண்மைத்தன்மை குறித்து உயர் நீதிமன்றம் தற்போது விசாரணை மேற்கொண்டு வருகிறது.