கர்நாடக மாநிலத்தின் புதிய முதலமைச்சராக டி.கே.சிவகுமார் கடந்த 3-ம் தேதி பொறுப்பேற்றுக்கொண்டார். அவருடன் சேர்த்து துணை முதலமைச்சர் மற்றும் 12 அமைச்சர்களும் பதவியேற்றனர். இந்த புதிய அமைச்சரவையில் மூத்த காங்கிரஸ் தலைவரான ராமலிங்க ரெட்டிக்கு நீர்வளத் துறை அமைச்சகம் ஒதுக்கப்பட்டது. தனக்கு ஒதுக்கப்பட்ட துறையில் திருப்தி இல்லாததால் அதிருப்தி அடைந்த ராமலிங்க ரெட்டி, பதவியேற்ற இரண்டே நாட்களில், அதாவது நேற்று முன்தினம் தனது அமைச்சர் பதவியை திடீரென ராஜினாமா செய்தார். புதிய அரசு அமைந்த உடனேயே மூத்த அமைச்சர் ஒருவர் போர்க்கொடி தூக்கியது முதலமைச்சர் டி.கே.சிவகுமாருக்கு பெரும் அரசியல் நெருக்கடியை ஏற்படுத்தியது.
சமாதானப் படலத்தைக் கையில் எடுத்த முதல்வர் மற்றும் சித்தராமையா
இந்த இக்கட்டான சூழலைத் தொடர்ந்து, அதிருப்தியில் இருந்த ராமலிங்க ரெட்டியைச் சமாதானப்படுத்தும் அதிரடி முயற்சியில் முதலமைச்சர் டி.கே.சிவகுமார் இறங்கினார். ராமலிங்க ரெட்டியுடன் இரண்டு முறை தொலைபேசி வாயிலாகத் தொடர்பு கொண்டு பேசிய முதலமைச்சர், தனது ராஜினாமா கடிதத்தை உடனடியாகத் திரும்பப் பெறுமாறு கேட்டுக்கொண்டார். அவரைத் தொடர்ந்து முன்னாள் முதலமைச்சர் சித்தராமையாவும் ராமலிங்க ரெட்டியுடன் பேச்சுவார்த்தை நடத்தினார். இந்த விவகாரம் டெல்லி வரை சென்றதை அடுத்து, கர்நாடக காங்கிரஸ் மேலிடப் பொறுப்பாளரான ரந்தீப் சிங் சுர்ஜேவாலாவும் ராமலிங்க ரெட்டியை நேரில் சந்தித்து சுமார் ஒரு மணி நேரம் தீவிர ஆலோசனை மேற்கொண்டார்.
வாட்ஸ்அப் கடித விவகாரம் குறித்து முதலமைச்சர் விளக்கம்
இந்த தொடர் சமாதானப் பேச்சுவார்த்தைகளின் பலனாக ராமலிங்க ரெட்டியின் அதிருப்தி முடிவுக்கு வந்தது. இதுகுறித்து பெங்களூருவில் செய்தியாளர்களைச் சந்தித்த முதலமைச்சர் டி.கே.சிவகுமார், ராமலிங்க ரெட்டி தனது நெருங்கிய நண்பர் என்றும், அவருடன் இருந்த கருத்து வேறுபாடுகள் அனைத்தும் பேசி சுமுகமாக முடிக்கப்பட்டு விட்டன என்றும் தெரிவித்தார். மேலும், ராமலிங்க ரெட்டி தனக்கு வாட்ஸ்அப் செயலி மூலமாகத்தான் ராஜினாமா கடிதத்தை அனுப்பியிருந்தார் என்றும், தற்போது அதனைத் திரும்பப் பெற்றுக்கொள்வதாக அவரே கூறிவிட்டார் என்றும் விளக்கமளித்தார். எனவே, இந்த விவகாரத்தை யாரும் பெரிதுபடுத்த வேண்டாம் என்றும், தேவையில்லாமல் புதிய கதைகளை உருவாக்கி அரசுக்கு நெருக்கடி கொடுக்க முயல வேண்டாம் என்றும் செய்தியாளர்களிடம் கேட்டுக்கொண்டார்.