பாரதப் பிரதமர் நரேந்திர மோடி அவர்கள் மாதந்தோறும் நிகழ்த்தும் 'மனதின் குரல்' (மன் கி பாத்) வானொலி உரையின் 131-வது நிகழ்வு இன்று நடைபெற்றது. இதில் தமிழகத்தின் முன்னாள் முதல்வர் செல்வி ஜெயலலிதா அவர்களின் பிறந்தநாளான பிப்ரவரி 24-ஐ முன்னிட்டு, அவருடனான நட்பையும் அவரது ஆளுமையையும் பிரதமர் மோடி மிகுந்த மரியாதையுடன் நினைவு கூர்ந்தார். ஜெயலலிதா அவர்கள் மக்கள் நலனுக்காகவும், தேசத்தின் கலாச்சாரப் பெருமையைப் பாதுகாப்பதிலும் காட்டிய உறுதிமிக்க செயல்பாடுகளைப் பிரதமர் தனது உரையில் வெகுவாகப் பாராட்டினார்.
மக்கள் நெஞ்சில் நீங்கா இடம் பிடித்த மகத்தான தலைவி!
தமிழக முன்னாள் முதல்வர் ஜெயலலிதா அவர்கள் மக்களின் இதயங்களில் என்றென்றும் நிலைத்திருக்கும் ஒரு தலைவர் என்று குறிப்பிட்ட பிரதமர், நான் தமிழகம் செல்லும் போதெல்லாம் அவர் மீது மக்கள் வைத்துள்ள அசைக்க முடியாத அன்பை நேரடியாகக் காண்பதாகத் தெரிவித்தார். குறிப்பாக, பெண்கள் மற்றும் தாய்மார்களின் முன்னேற்றத்திற்காக அவர் செயல்படுத்திய முன்னோடித் திட்டங்கள் மற்றும் சட்டம் ஒழுங்கை நிலைநாட்ட அவர் எடுத்த இரும்புக்கரம் கொண்ட நடவடிக்கைகள் மற்ற மாநிலங்களுக்கு முன்னுதாரணமாக அமைந்ததை மோடி சுட்டிக்காட்டினார்.
நட்பும் நல்லாட்சியும்
பிரதமர் மோடி தனது உரையில் ஜெயலலிதாவுடனான தனிப்பட்ட நட்பை நெகிழ்ச்சியுடன் பகிர்ந்துகொண்டார். கடந்த 2002 மற்றும் 2012-ஆம் ஆண்டுகளில் தாம் குஜராத் முதலமைச்சராகப் பதவியேற்ற விழாக்களில் ஜெயலலிதா நேரில் கலந்துகொண்டதை நினைவுகூர்ந்த அவர், இரு மாநில முதலமைச்சர்களாக இருவரும் நல்லாட்சி குறித்து ஆலோசித்த தருணங்களைப் பட்டியலிட்டார். "அவரது சிந்தனையில் எப்போதும் ஒரு தெளிவு இருக்கும், அதுவே அவரது தனிச்சிறப்பு" என்று புகழாரம் சூட்டியதோடு, பல ஆண்டுகளுக்கு முன்பு பொங்கல் திருவிழாவின் போது ஜெயலலிதா தமக்கு அளித்த மதிய உணவு விருந்தின் அன்பை என்றும் மறக்க முடியாது என்றும் குறிப்பிட்டார்.
இந்தியப் பண்பாட்டின் மீது கொண்ட பற்று!
ஜெயலலிதா அவர்கள் ஒரு சிறந்த தேசபக்தி உணர்வு கொண்டவர் என்றும், இந்தியாவின் தொன்மையான கலாச்சாரப் பாரம்பரியத்தைப் போற்றிப் பாதுகாப்பதில் அவர் மிகுந்த பெருமை கொண்டிருந்தார் என்றும் பிரதமர் மோடி புகழாரம் சூட்டினார். சமுதாயத்தின் விளிம்புநிலை மக்களுக்காக அவர் ஆற்றிய அளப்பரிய சேவைகள் இந்திய வரலாற்றில் என்றும் நிலைத்திருக்கும் எனக்கூறி தனது உரையை நிறைவு செய்தார்.