தெலுங்கானா மாநிலம் ஹைதராபாத்தில், திருமணத்தை மறுத்த 24 வயது இளம்பெண்ணின் உடலில் எச்.ஐ.வி (HIV) பாதிப்புள்ள இரத்தத்தைப் பலவந்தமாகச் செலுத்திய கொடூரச் சம்பவம் கடந்த மார்ச் 11-ம் தேதி நடைபெற்றது. பாதிக்கப்பட்ட பெண்ணும், குற்றவாளியான மனோகர் என்பவரும் உறவினர்கள் ஆவர். இவர்களுக்குத் திருமணம் செய்யப் பெரியோர்களால் நிச்சயிக்கப்பட்டிருந்தது.
உண்மை தெரிந்ததும் ரத்து செய்யப்பட்ட திருமணம்
மனோகரின் பெற்றோருக்கு ஏற்கனவே எச்.ஐ.வி பாதிப்பு இருந்ததால், சந்தேகமடைந்த பெண்ணின் பெற்றோர் கடந்த ஆண்டு செப்டம்பர் மாதம் மனோகருக்கு இரத்தப் பரிசோதனை செய்தனர். அதில் அவருக்கும் எச்.ஐ.வி பாதிப்பு இருப்பது உறுதி செய்யப்பட்டது. இதனால் அதிர்ச்சியடைந்த இளம்பெண், இந்தத் திருமணத்தை உடனடியாக ரத்து செய்தார். இதில் ஆத்திரமடைந்த மனோகர், அந்தப் பெண்ணின் வீட்டிற்குள் புகுந்து தனது உடலில் இருந்து எடுத்த எச்.ஐ.வி தொற்றுள்ள இரத்தத்தைப் பெண்ணின் உடலில் ஊசி மூலம் வலுக்கட்டாயமாகச் செலுத்தினார்.
சமூக அவதூறு பயத்தில் விபரீத முடிவு
இந்தச் சம்பவம் தொடர்பாக மனோகர் கைது செய்யப்பட்டு சிறையில் அடைக்கப்பட்டார். இருப்பினும், எச்.ஐ.வி தொற்று குறித்த அச்சம், சமூக அவதூறு மற்றும் ஏற்பட்ட மன உளைச்சலால் அந்த இளம்பெண் கடந்த ஒரு மாதமாகத் கடும் மன அழுத்தத்தில் இருந்துள்ளார். இந்நிலையில், கடந்த வெள்ளிக்கிழமை அந்தப் பெண் தனது வீட்டில் தூக்கிட்ட நிலையில் கண்டெடுக்கப்பட்டார். அவரை மீட்டு அரசு மருத்துவமனைக்குக் கொண்டு சென்றும் பலனின்றி அவர் உயிரிழந்ததாக மருத்துவர்கள் அறிவித்தனர்.
பாதிக்கப்பட்ட பெண்ணின் மனநிலையைச் சிதைத்த இந்தத் தாக்குதலே அவரைத் தற்கொலைக்குத் தூண்டியதாகப் போலீசார் சந்தேகிக்கின்றனர். இது குறித்து போச்சாரம் ஐடி காரிடார் போலீசார் தீவிர விசாரணை நடத்தி வருகின்றனர்.