உத்தரப் பிரதேச மாநிலம் காசியாபாத்தைச் சேர்ந்த 31 வயது இளைஞர் ஹரீஷ் ராணாவுக்கு வழங்கப்பட்டு வரும் உயிர் காக்கும் கருவிகளை அகற்ற உச்ச நீதிமன்றம் வரலாற்றுச் சிறப்புமிக்க அனுமதியை வழங்கியுள்ளது. கடந்த 2013-ஆம் ஆண்டு பஞ்சாப் பல்கலைக்கழகத்தில் படித்துக்கொண்டிருந்தபோது, தங்கியிருந்த விடுதியின் 4-வது மாடியில் இருந்து தவறி விழுந்த ஹரீஷ் ராணாவுக்கு மூளையில் பலத்த காயம் ஏற்பட்டது. கடந்த 13 ஆண்டுகளாக எவ்வித முன்னேற்றமும் இன்றி, செயற்கை சுவாசக் குழாய் மற்றும் உணவுக் குழாய் உதவியுடன் அவர் ஒரு தாவரத்தைப் போன்ற நிலையிலேயே வாழ்ந்து வந்தார்.
தங்கள் மகனின் துயரத்தைப் பார்க்க முடியாமல், அவருக்கு அளிக்கப்படும் சிகிச்சையை நிறுத்தி கருணைக் கொலை செய்ய அனுமதி கோரி அவரது பெற்றோர் தொடர்ந்த வழக்கை நீதிபதிகள் ஜே.பி. பார்திவாலா மற்றும் கே.வி. விஸ்வநாதன் ஆகியோர் விசாரித்தனர். இந்த வழக்கின் தீர்ப்பை வாசிக்கும்போது நீதிபதி பார்திவாலா உணர்ச்சிவசப்பட்டு கண்கலங்கினார். ஒரு திறமையான மாணவராக இருந்த இளைஞர், இன்று பிறர் உதவியின்றி எதையும் செய்ய முடியாத நிலையில் இருப்பதை எண்ணி அவரது குரல் தழுதழுத்தது.
சிகிச்சையைத் தொடர்வதால் நோயாளிக்கு எந்தப் பயனும் இல்லை என்பதாலும், அது அவரது நலனுக்கே எதிரானது என்பதாலும், உயிர் காக்கும் கருவிகளை அகற்ற நீதிபதிகள் சம்மதம் தெரிவித்தனர். மேலும், இதுபோன்ற இக்கட்டான சூழலில் இருப்பவர்களைக் கருணைக் கொலை செய்வது தொடர்பாக முறையான சட்டம் இயற்றுவது குறித்து மத்திய அரசு பரிசீலிக்க வேண்டும் என்றும் நீதிமன்றம் வலியுறுத்தியுள்ளது. இந்தியாவில் கருணைக் கொலைக்கு உச்ச நீதிமன்றம் நேரடியாக அனுமதி வழங்கியிருப்பது இதுவே முதல் முறையாகும்.