ஹரியானா மாநிலத்தைச் சேர்ந்த பெண் நீதிபதி ஒருவர், 'டின்டர்' (Tinder) என்ற ஆன்லைன் வர்த்தக டேட்டிங் செயலி மூலம் 'அபிமன்யு வசிஷ்ட்' என்ற நபருடன் அறிமுகமாகியுள்ளார். தான் ஒரு ரகசிய அரசுத் துறையில் உயர் அதிகாரியாகப் பணியாற்றி வருவதாக அந்த நபர் நீதிபதியிடம் பொய் கூறியுள்ளார். நாளடைவில் இருவருக்குள்ளும் காதல் மலர்ந்துள்ளது. இந்தச் சூழலைப் பயன்படுத்திக் கொண்ட அந்தப் பலே ஆசாமி, அதிக லாபம் தரும் திட்டங்களில் முதலீடு செய்வதாகக் கூறி, அந்தப் பெண் நீதிபதியிடமிருந்து பல தவணைகளாக ரூ.52 லட்சத்திற்கும் அதிகமான பணத்தைச் சுருட்டியுள்ளார்.
வேலைக்காரி பெயரில் போலீசில் போலிப் புகார்
தான் ஏமாற்றப்பட்டதை உணர்ந்த பெண் நீதிபதி, பணத்தைத் திரும்பக் கேட்டும் வராததால் அதிர்ச்சியடைந்தார். ஆனால், ஒரு நீதிபதியாக இருந்து கொண்டு டேட்டிங் செயலியில் ஏமாந்த விஷயம் வெளியில் தெரிந்தால் தனக்கு அசிங்கம் என்று அவர் பயந்துள்ளார். இதனால், தனது வீட்டில் பணிபுரியும் வேலைக்காரப் பெண்னைப் பகடைக்காயாகப் பயன்படுத்தியுள்ளார். டின்டர் செயலி மூலம் தன்னை ஒரு நபர் ஏமாற்றிவிட்டதாக அந்த வேலைக்காரப் பெண்ணின் பெயரில் காவல் நிலையத்தில் புகார் அளிக்கப்பட்டு, வழக்கும் (FIR) பதிவு செய்யப்பட்டது. இதனைத் தொடர்ந்து, அந்த மோசடி ஆசாமியைக் காவல் துறையினர் கைது செய்து சிறையில் அடைத்தனர்.
நீதிமன்றத்தில் அம்பலமான உண்மை
கீழ் நீதிமன்றம் தனக்கு ஜாமீன் வழங்க மறுத்ததைத் தொடர்ந்து, குற்றம் சாட்டப்பட்ட நபர் டெல்லி செஷன்ஸ் நீதிமன்றத்தில் மேல்முறையீடு செய்தார். இந்த ஜாமீன் மனுவை கூடுதல் செஷன்ஸ் நீதிபதி சௌரப் பிரதாப் சிங் லாலர் விசாரித்தார். அப்போது, பணப் பரிவர்த்தனை நடந்த வங்கி கணக்குகளை ஆய்வு செய்த நீதிபதிக்கு பெரும் அதிர்ச்சி காத்திருந்தது. ஏனெனில், மோசடி செய்யப்பட்டதாகக் கூறப்படும் ரூ.52 லட்சமும் வேலைக்காரப் பெண்ணின் கணக்கிலிருந்து செல்லவில்லை, மாறாக அந்தப் பெண் நீதிபதியின் சொந்த வங்கி கணக்குகளிலிருந்துதான் அனுப்பப்பட்டுள்ளது என்பது வெளிச்சத்திற்கு வந்தது.
நீதிபதியின் செயலுக்கு கோர்ட் கண்டனம்
உண்மையான பாதிக்கப்பட்ட நபர் யார் என்பதை மறைத்துவிட்டு, ஒரு நீதிபதியாக இருப்பவரே நேரடியாகப் புகார் அளிக்காமல், சட்ட அமைப்பை ஏமாற்றித் தனது வேலைக்காரி பெயரில் மறைமுகமாகப் புகார் அளித்ததற்கு நீதிமன்றம் கடும் அதிருப்தி தெரிவித்தது. இத்தகைய காதல் மோசடிகளில் (Romance Scams) சிக்கி ஏமாறுபவர்களுக்குச் சமூகத்தில் அவமானம் ஏற்படுவது இயல்புதான் என்றாலும், அதற்காகப் புலனாய்வுத் துறையைத் திசைதிருப்பும் வகையில் செயல்படுவதை ஏற்றுக்கொள்ள முடியாது என்று நீதிமன்றம் திட்டவட்டமாகக் கூறியது.
குறைபாடான விசாரணை மற்றும் ஜாமீன் மறுப்பு
இந்த வழக்கின் விசாரணையில் பல ஓட்டைகள் இருப்பதாகக் குறிப்பிட்ட நீதிமன்றம், இருவருக்கும் இடையே நடந்த டின்டர் சாட்டிங் விவரங்களையோ, முழுமையான வாட்ஸ்அப் உரையாடல்களையோ, போன் கால் விபரங்களையோ (CDR) போலீசார் இன்னும் சேகரிக்கவில்லை என்று சாடியது. அதே சமயம், குற்றம் சாட்டப்பட்ட நபரும் தனது மொபைல் போனைத் தராமல், பெண் நீதிபதி அனுப்பிய மெசேஜ்களை மட்டும் காட்டி, தான் அனுப்பிய பதில்களை மறைத்து 'கண்ணாமூச்சி' ஆடியுள்ளார் என்றும் நீதிமன்றம் சுட்டிக்காட்டியது.
வழக்கின் முக்கிய ஆதாரங்கள் இன்னும் திரட்டப்படாததாலும், விசாரணை முழுமையடையாததாலும் அந்த நபருக்கு ஜாமீன் வழங்க நீதிமன்றம் மறுத்துவிட்டது. மேலும், இருவரின் முழுமையான வாட்ஸ்அப், டின்டர் பதிவுகளைப் பெறவும், மொபைல் போனை தடயவியல் ஆய்வுக்கு உட்படுத்தவும் போலீசாருக்கு நீதிமன்றம் அதிரடி உத்தரவிட்டுள்ளது.