குஜராத் மாநிலத்தில் மனைவி தொடர்ந்து பணம் கேட்டு தொல்லை செய்வதால் விரக்தியடைந்த கணவர் ஒருவர், தன்னை கருணைக்கொலை செய்ய அனுமதிக்குமாறு மாவட்ட ஆட்சியர் அலுவலகத்தில் மனு அளித்துள்ள விவகாரம் அம்மாநிலத்தில் பெரும் பரபரப்பை ஏற்படுத்தியுள்ளது. பெண்கள் பாதுகாப்பு சட்டங்களைத் தனக்குச் சாதகமாகப் பயன்படுத்தி, மனைவி பொய் புகார்களை அளிப்பதாக அவர் வேதனையுடன் தெரிவித்துள்ளார்.
மூன்றாவது திருமணத்தில் வந்த வினை
குஜராத் மாநிலம் சூரத் நகரைச் சேர்ந்தவர் கிரீட் படேல். இவருக்கும் இவரது மனைவிக்கும் கடந்த 2024 ஆம் ஆண்டு நவம்பர் 14 ஆம் தேதி திருமணம் நடைபெற்றுள்ளது. கணவர், மனைவி இருவருக்குமே இது மூன்றாவது திருமணமாகும். கிரீட் படேலுக்கு ஏற்கனவே முந்தைய மனைவி மூலம் பிறந்த ஒரு குழந்தையும் உள்ளது. இந்த நிலையில், திருமணமான சில நாட்களிலிருந்தே அவரது மனைவி தொடர்ந்து பணம் கேட்டு கிரீட் படேலை சித்திரவதை செய்து வந்ததாகக் கூறப்படுகிறது.
சட்டங்களைத் தவறாகப் பயன்படுத்தும் மனைவி
தங்களுக்குள் குடும்பச் சண்டை ஏற்படும் போதெல்லாம், அவரது மனைவி பெண்களுக்கு ஆதரவாக இருக்கும் சட்டங்களை ஆயுதமாகப் பயன்படுத்தி கிரீட் படேலுக்கு எதிராகப் புகார் அளிப்பதை வாடிக்கையாகக் கொண்டுள்ளார். வீட்டில் முதலில் அவராகவே தகராறைத் தொடங்கிவிட்டு, பின்னர் பெண்களுக்கான அவசர உதவி எண்களுக்குத் தொடர்பு கொண்டு கணவர் மீது பழிபோடுவதாக கிரீட் படேல் குற்றம் சாட்டியுள்ளார். அதுமட்டுமன்றி, தனது முந்தைய மனைவியின் குழந்தையையும் அவர் சித்திரவதை செய்ததாகவும், இது குறித்து காவல் நிலையத்தில் புகார் அளித்தும் போலீசார் எந்தவித நடவடிக்கையும் எடுக்கவில்லை என்றும் அவர் வேதனை தெரிவித்துள்ளார்.
ஆட்சியர் அலுவலகத்தில் விபரீத கோரிக்கை
தொடர் குடும்பக் கொடுமைகளால் விரக்தியின் உச்சிக்கே சென்றுள்ள கிரீட் படேல், இந்தத் துயரத்திலிருந்து விடுபட வேறு வழியே தெரியாமல் சூரத் மாவட்ட ஆட்சியர் அலுவலகத்திற்கு நேரில் சென்று புகார் மனு ஒன்றை அளித்துள்ளார். அதில், தனது குடும்பப் பிரச்சினைகளுக்குக் குறிப்பிட்ட காலக்கெடுவுக்குள் தீர்வு காணாவிட்டால் தான் ஏதேனும் விபரீத முடிவு எடுக்க நேரிடும் என்றும், அதனால் அரசாங்கமே தன்னை கருணைக்கொலை செய்துவிட வேண்டும் என்றும் உருக்கமாகக் குறிப்பிட்டுள்ளார். இந்த மனு குஜராத் விவாகாரத்தில் புதிய விவாதத்தை ஏற்படுத்தியுள்ளது.
Follow us on our official WhatsApp channel for breaking news alerts and updates!