இந்திய அரசியலின் மூத்த தலைவரும், முன்னாள் மத்திய ரயில்வே அமைச்சருமான முகுல் ராய் (71), கொல்கத்தாவில் உள்ள தனியார் மருத்துவமனையில் இன்று (பிப்ரவரி 23) அதிகாலை காலமானார். கடந்த சில நாட்களாக உடல்நலக்குறைவு காரணமாக ஆழ்ந்த கோமா நிலையில் சிகிச்சை பெற்று வந்த அவருக்கு, அதிகாலை 1.30 மணி அளவில் மாரடைப்பு ஏற்பட்டதில் உயிர் பிரிந்ததாக அவரது குடும்பத்தினர் அதிகாரப்பூர்வமாகத் தெரிவித்துள்ளனர். இவரது மறைவு மேற்கு வங்க அரசியலில் ஒரு பெரும் வெற்றிடத்தை ஏற்படுத்தியுள்ளது.
திரிணமூல் காங்கிரஸின் தூணாகத் திகழ்ந்தவர்!
மேற்கு வங்க முதல்வர் மம்தா பானர்ஜியின் நம்பிக்கைக்குரிய தளபதியாகத் திகழ்ந்த முகுல் ராய், திரிணமூல் காங்கிரஸ் கட்சி தொடங்கப்பட்ட காலம் முதலே அதன் முக்கியத் தூணாகச் செயல்பட்டார். 1998 முதல் 2015 வரை அக்கட்சியின் தேசிய பொதுச்செயலாளராகப் பணியாற்றிய அவர், கட்சியின் வளர்ச்சிக்கு அடித்தளமிட்டவர். மத்திய அரசில் இணை அமைச்சராகவும், பின்னர் ரயில்வே அமைச்சராகவும் பொறுப்பு வகித்துத் தனது நிர்வாகத் திறமையை நிரூபித்தவர். மேலும், 2006 முதல் 2017 வரை மாநிலங்களவை உறுப்பினராகவும் மக்கள் பணியாற்றியுள்ளார்.
பாஜக பயணம் மற்றும் மீண்டும் தாய் கழகம்!
நீண்ட கால நட்பிற்குப் பிறகு 2017-ல் மம்தா பானர்ஜியுடன் ஏற்பட்ட கருத்து வேறுபாட்டால் பாஜகவில் இணைந்த முகுல் ராய், 2021 சட்டப்பேரவைத் தேர்தலில் கிருஷ்ணாநகர் தொகுதியில் போட்டியிட்டு வெற்றி பெற்றார். எனினும், தேர்தல் முடிவுகளுக்குப் பிறகு மீண்டும் தனது தாய் கழகமான திரிணமூல் காங்கிரஸுக்கே திரும்பினார். இவரது மறைவுக்கு மேற்கு வங்க ஆளுநர், முதல்வர் மம்தா பானர்ஜி மற்றும் பல்வேறு அரசியல் கட்சித் தலைவர்கள் தங்களது ஆழ்ந்த இரங்கல்களைத் தெரிவித்து வருகின்றனர்.