கர்நாடக மாநிலத்தின் புதிய முதலமைச்சராகத் தேர்ந்தேடுக்கப்பட்டுள்ள காங்கிரஸ் கட்சியின் மூத்த தலைவர் டி.கே.சிவகுமார் இன்று மாலை அதிகாரப்பூர்வமாகப் பதவிப் பிரமாணம் எடுத்துக்கொள்கிறார். முன்னதாக, காங்கிரஸ் மேலிடத்தின் அதிரடி உத்தரவின் பேரில் கடந்த 28ஆம் தேதி சித்தராமையா தனது முதல்வர் பதவியை ராஜினாமா செய்திருந்தார். இதனைத் தொடர்ந்து நடைபெற்ற காங்கிரஸ் சட்டமன்றக் குழுக் கூட்டத்தில் டி.கே.சிவகுமார் முறைப்படி புதிய தலைவராக ஏகமனதாகத் தேர்ந்தெடுக்கப்பட்டார். பின்னர் ஆளுநர் தாவர்சந்த் கெலாட்டை நேரில் சந்தித்து ஆட்சி அமைக்க உரிமை கோரியதை அடுத்து, இன்று பெங்களூருவில் உள்ள ராஜ்பவனில் (மக்கள் மாளிகை) மிக எளிமையான முறையில் நடைபெறும் விழாவில் அவர் புதிய முதல்வராக அரியணை ஏறுகிறார்.
டெல்லியில் முகாமிட்ட மூத்த தலைவர்கள்
டி.கே.சிவகுமார் முதல்வராகப் பொறுப்பேற்கும் அதே வேளையில், அவரது புதிய அமைச்சரவையில் தங்களுக்கு முக்கிய இடங்களைப் பிடிப்பதற்காக காங்கிரஸ் கட்சியின் மூத்த எம்.எல்.ஏக்களிடையே மிகக் கடுமையான போட்டி நிலவி வருகிறது. குறிப்பாக, முந்தைய சித்தராமையா அமைச்சரவையில் செல்வாக்குமிக்க அமைச்சர்களாக வலம் வந்த கே.ஜே.ஜார்ஜ், கே.எச்.முனியப்பா உள்ளிட்ட மூத்த தலைவர்கள் தங்களது பதவிகளை மீண்டும் தக்கவைத்துக்கொள்ளும் நோக்கில், கடந்த சில தினங்களாக டெல்லியிலேயே தங்கி அகில இந்திய காங்கிரஸ் மேலிடத் தலைவர்களைச் சந்தித்துக் காய் நகர்த்தி வருகின்றனர்.
மகனுக்குப் பதவி கேட்கும் சித்தராமையா
மற்றொருபுறம், பதவியை இழந்த முன்னாள் முதலமைச்சர் சித்தராமையா, காங்கிரஸ் மேலிடத்தை அணுகித் தனது மகனும் தற்போதைய சட்ட மேலவை உறுப்பினருமான (எம்எல்சி) யதீந்திராவுக்கு எப்படியாவது புதிய அமைச்சரவையில் அமைச்சர் பதவியை ஒதுக்கீடு செய்ய வேண்டும் எனத் தீவிரமாக வலியுறுத்தி வருவதாகத் தலைநகர் வட்டாரங்கள் தெரிவிக்கின்றன.
புதியவர்களுக்கு வாய்ப்பு கேட்கும் சிவகுமார் ஆதரவாளர்கள்
இவற்றுக்கு மத்தியில், புதிய முதலமைச்சர் டி.கே.சிவகுமாரின் தீவிர ஆதரவாளர்கள் கட்சித் தலைமைக்கு புதிய நிபந்தனை ஒன்றை விதித்துள்ளனர். கடந்த மூன்று ஆண்டுகளாகத் தொடர்ந்து அமைச்சர்களாகப் பதவி வகித்தவர்களுக்கு மீண்டும் அமைச்சரவையில் வாய்ப்பளிக்கக் கூடாது என்றும், இந்த முறை முற்றிலும் புதிய முகங்களுக்கு முன்னுரிமை வழங்கி அமைச்சர்களாக்க வேண்டும் என்றும் அவர்கள் போர்க்கொடி தூக்கியுள்ளனர். அத்துடன் சாதிவாரியாகவும், மண்டல வாரியாகவும் சமமான பிரதிநிதித்துவம் அளிக்கப்பட வேண்டும் என பட்டியலின, ஓபிசி மற்றும் சிறுபான்மையின பிரிவுகளைச் சேர்ந்த மூத்த தலைவர்கள் காங்கிரஸ் மேலிடத்திற்குத் தங்களின் அழுத்தங்களை வாரி இறைத்து வருகின்றனர். தங்களுக்குப் பதவி கிடைக்க வேண்டும் என்பதற்காகப் பிரியங்க் கார்கே, ஜி.பரமேஸ்வரா, பொன்னண்ணா, ரிஸ்வான் அர்ஷத், ஜமீர் அகமது கான், என்.ஏ.ஹாரீஷ் உள்ளிட்ட 20-க்கும் மேற்பட்ட முக்கிய எம்.எல்.ஏக்கள் டெல்லியில் முகாமிட்டுள்ளனர்.
துணை முதல்வர் நாற்காலிக்கு முட்டும் தலைவர்கள்
அமைச்சர் பதவிக்கான சண்டையை விட, துணை முதலமைச்சர் நாற்காலியைக் கைப்பற்றுவதில் கர்நாடக காங்கிரஸில் மிகப்பெரிய கோஷ்டி பூசல் வெடித்துள்ளது. பரமேஸ்வரா, முனியப்பா, ஜமீர் அகமது, எம்.பி.பாட்டீல், யு.டி.காதர், சதீஷ் ஜார்கிஹோளி ஆகியோர் தங்களுக்குத் துணை முதல்வர் பதவி வழங்கியே தீர வேண்டும் என மேலிடத் தலைவர்களிடம் ஒற்றைக்காலில் நின்று வற்புறுத்தி வருகின்றனர். இதில் சுவாரஸ்யமாக, முன்னாள் முதல்வர் சித்தராமையாவும் கர்நாடகாவில் உள்ள நான்கு முக்கிய மண்டலங்களையும் திருப்திப்படுத்தும் வகையில் தலா ஒரு துணை முதல்வர் வீதம் மொத்தம் 4 துணை முதல்வர் பதவிகளை உருவாக்கி, அதற்கேற்ப அமைச்சர் பதவிகளையும் பிரித்து வழங்கலாம் என மேலிடத்திற்கு யோசனை கூறியுள்ளதாகத் தெரிகிறது. இந்த அதீத அழுத்தங்கள் காரணமாகவே, புதிய அமைச்சரவைப் பட்டியலை இறுதி செய்ய முடியாமல் காங்கிரஸ் தலைமை தவித்து வருகிறது.