பெங்களூருவில் உள்ள பன்னேருகட்டா உயிரியல் பூங்காவிற்கு, விலங்கு பரிமாற்றத் திட்டத்தின் கீழ் தென்னாப்பிரிக்காவிலிருந்து இரண்டு பெண் சிறுத்தைகள் உட்பட மொத்தம் நான்கு சிறுத்தைகள் சனிக்கிழமை கொண்டு வரப்பட்டன. தென்னாப்பிரிக்காவின் இந்துனா பிரைமேட் மற்றும் பேரட் பூங்காவிலிருந்து புறப்பட்ட இந்தச் சிறுத்தைகள், சனிக்கிழமை அதிகாலை 1.15 மணியளவில் கெம்பேகவுடா சர்வதேச விமான நிலையத்தை வந்தடைந்தன. வனவிலங்கு பாதுகாப்புச் சட்டத்தின் விதிகளுக்கு உட்பட்டு இந்த நடவடிக்கை மேற்கொள்ளப்பட்டுள்ளதாக பூங்கா நிர்வாகம் தெரிவித்துள்ளது.
பாதுகாப்பு மற்றும் அறிவியல் ஆராய்ச்சி நோக்கம்
இந்த முயற்சியின் மூலம் வனவிலங்கு பாதுகாப்புப் பணிகளை வலுப்படுத்தவும், சிறைபிடிக்கப்பட்ட விலங்குகளிடையே மரபணுப் பன்முகத்தன்மையை மேம்படுத்தவும் பன்னேருகட்டா உயிரியல் பூங்கா திட்டமிட்டுள்ளது. மேலும், பொதுமக்களிடையே விழிப்புணர்வை ஏற்படுத்துதல் மற்றும் அறிவியல் ஆராய்ச்சிகளுக்கு ஆதரவளித்தல் ஆகியவையும் இதன் முக்கிய நோக்கங்களாகும். விமான நிலையத்தின் சரக்கு முனையத்தில் சிறுத்தைகளை வரவேற்ற வனத்துறை அமைச்சர் ஈஸ்வர் கந்த்ரே, அடுத்த 30 நாட்களுக்கு இந்தச் சிறுத்தைகளைத் தீவிரக் கண்காணிப்பில் வைத்திருக்கவும், முறையான உணவு மற்றும் தனிமைப்படுத்துதல் விதிகளைப் பின்பற்றவும் அதிகாரிகளுக்கு உத்தரவிட்டார்.
கர்நாடகக் காடுகளில் மறைந்த ‘சிவிங்கி’
கர்நாடகக் காடுகளில் ஒரு காலத்தில் ‘சிவிங்கி’ என்று அழைக்கப்பட்ட சிறுத்தைகள் தற்போது முற்றிலும் மறைந்துவிட்டதாகக் குறிப்பிட்ட அமைச்சர், இத்தகைய உயிரியல் பூங்காக்கள் மூலம் மக்கள் மத்தியில் விழிப்புணர்வை ஏற்படுத்துவது அவசியம் என்றார். விலங்குகளின் பாதுகாப்பு மற்றும் நல்வாழ்விற்கு முன்னுரிமை அளிக்குமாறு கர்நாடக உயிரியல் பூங்கா ஆணையத்தின் உறுப்பினர் செயலர் டாக்டர் சுனில் பன்வாருக்கு அவர் அறிவுறுத்தினார்.
கடுமையான மருத்துவப் பரிசோதனைகள்
போக்குவரத்திற்கு முன்னதாக, தென்னாப்பிரிக்காவில் உள்ள கால்நடை பராமரிப்புத் துறையின் வழிகாட்டுதல்களின்படி இந்தச் சிறுத்தைகளுக்கு முழுமையான மருத்துவப் பரிசோதனைகள் மற்றும் தனிமைப்படுத்துதல் முறைகள் மேற்கொள்ளப்பட்டன. இறக்குமதி செய்வதற்குத் தேவையான தடையில்லாச் சான்றிதழ்கள் முறையாகப் பெறப்பட்டுள்ளன. தற்போது பன்னேருகட்டா பூங்காவில் உள்ள பிரத்யேகக் காப்பகத்தில் வைக்கப்பட்டுள்ள இந்தச் சிறுத்தைகள், மருத்துவக் கண்காணிப்பிற்குப் பிறகு பொதுமக்களின் பார்வைக்காக மாற்றப்படும் எனத் தெரிவிக்கப்பட்டுள்ளது.