அசாம் மாநிலம் கர்பி ஆங்லாங் பகுதியில் விபத்துக்குள்ளான சுகோய்-30 MKI போர் விமானத்தில் பயணித்த இரண்டு இளம் விமானிகள் உயிரிழந்ததை இந்திய விமானப்படை மிகுந்த துயரத்துடன் உறுதி செய்துள்ளது. ஜோர்ஹாட் விமானப்படைத் தளத்திலிருந்து பயிற்சிக்காகப் புறப்பட்ட இந்த விமானம், சுமார் 60 கிலோமீட்டர் தொலைவில் உள்ள மலைப்பாங்கான பகுதியில் விழுந்து நொறுங்கியது. இந்த விபத்தில் விமானிகள் அனுஜ் மற்றும் புர்வேஷ் துராக்கர் ஆகியோர் உயிரிழந்தனர்.
இவர்களின் மறைவுக்கு இந்திய விமானப்படையின் அனைத்துப் பணியாளர்களும் இரங்கல் தெரிவித்துள்ளதோடு, இந்த இக்கட்டான தருணத்தில் அவர்களின் குடும்பத்தினருக்குத் துணையாக இருப்போம் என்றும் விமானப்படை தனது சமூக வலைதளப் பக்கத்தில் பதிவிட்டுள்ளது.
ரஷ்யாவின் சுகோய் நிறுவனத் தொழில்நுட்பத்துடன், இந்தியாவின் ஹிந்துஸ்தான் ஏரோநாட்டிக்ஸ் லிமிடெட் (HAL) நிறுவனத்தால் உள்நாட்டில் தயாரிக்கப்படும் இந்த சுகோய்-30 MKI விமானங்கள், இரண்டு இருக்கைகளைக் கொண்ட அதிநவீன போர் விமானங்களாகும். தற்போது இந்திய விமானப்படையிடம் இத்தகைய 260-க்கும் மேற்பட்ட விமானங்கள் பயன்பாட்டில் உள்ளன. கடந்த 2024 ஜூன் மாதம் நாசிக்கிலும், 2023 ஜனவரியில் குவாலியரிலும் இதே ரக விமானங்கள் விபத்துக்குள்ளான நிலையில், தற்போது அசாமில் நிகழ்ந்துள்ள இந்தச் சம்பவம் பெரும் சோகத்தை ஏற்படுத்தியுள்ளது.